“Qonşuda yaşlı xanım üçün təcili yardım çağırdıq. Yollar o qədər bərbaddır ki, ambulans məhəlləyə girə bilmədi. Qadın 1 saat sonra sağalıb özünə gəldi. Həkimlər də çatanda oturduq çay içdik”.
Bakuplus.az -ın məlumatına görə, bu sözləri Hövsan sakinlərindən biri bildirib.
Şikayətçinin sözlərinə görə, söhbət Hövsan qəsəbəsi, “Limon” kafesinin arxası, Anqar deyilən ərazidən gedir.
Bildirilib ki, iki il öncə burada sadəcə üzdə olan yerlərə asfalt çəkilib, qalan yerlərdə isə əziyyət başlayır.
“Bir damcı yağış yağan kimi aləm bir-birinə dəyir. Burada olan bütün məhəllələr bərbad vəziyyətdədir. İki il öncə asfalt çəkən əməkdaşlar işlərini bitirməmiş getdilər. Dedilər ki, istirahətə gedirik, maksimum iki günə gələcəyik. O gündən sonra səs-soraq yoxdur”, - deyə Hövsan sakini əlavə edib.
Şikayətçi bildirir ki, sırf bu yollara görə evlənmir:
“Bizim evə qonaq gələndə utandığımızdan gedib maşınla camaatı özümüz götürürük. Sırf toy görüntülərimdə bu yol düşəcək deyə evlənmək istəmirəm”.
Hövsan sakinləri müvafiq qurumların tezliklə gəlib işlərini tamamlamasını istəyir.
Məsələ ilə bağlı Azərbaycan Avtomobil Yolları Dövlət Agentliyinə sorğu ünvanladıq.
Qurumdan bildirildi ki, qəsəbədaxili küçələr agentliyin balansında deyil və agentlik tərəfindən o ərazilərdə investisiya proqramlarından kənar təmir işləri icra olunmur:
“İnvestisiya proqramına həmin ərazilərin daxil edilməsi isə yerli icra strukturları tərəfindən təmin olunur. Əgər həmin ərazilər yerli icra strukturları tərəfindən təqdimat əsasında investisiya proqramına daxil edilərsə, tərəfimizdən təmir işləri icra oluna bilər”.
