Bakının "ASK Arena” stadionunun yaxınlığında yerləşən tuneldən "İşığı söndürün, həyatım tort üfürəcək” yazılı plakatı asan şəxs həbs olunub. Bu haqda bu gün, 10 avqust tarixində Bakuplus.az Qaynarinfo-ya istinadən məlumat verir.
Saxlanılan şəxs 34 yaşlı Rusiya Federasiyasının İrkutsk vilayətinin Ust-Kut şəhərində anadan olmuş və hazırda Bakıda yaşayan Taleh Cəbiyevdir. Onun tanışı olan xanım üzərinə "İşığı söndürün, həyatım tort üfürəcək” və digər sözlər yazılmış plakat hazırlayaraq tuneldən asmasını ondan xahiş edib. Cəbiyev həmin yazını hərəkətini tənzimləyən vasitələrin üzərinə asdıqdan sonra yolun ortasında dayanaraq şəkil çəkdirib və həmin fotonu tanışı olan xanıma göndərib.
Əməli törətdiyi anda ona yol-patrul xidmətinin əməkdaşı yaxınlaşıb, lakin Cəbiyev onunla kobud şəkildə danışaraq plakatı sökməyəcəyini bildirib.
Polis dərhal hadisə yerinə YPX əməkdaşlarını çağırıb. Cəbiyev qaçmağa çalışsa da, tutularaq polis bölməsinə aparılıb. Məhkəmənin qərarına görə, əməli törədən şəxs 10 gün müddətinə həbs olunub.
