Xırdalan şəhərində həyat yoldaşı Sevinc Əhmədağayevanı qətlə yetirməkdə ittiham edilən Laçın Əhmədağayevin barəsində hökmdən verilmiş şikayətə baxılıb.
Teleqraf.az xəbər verir ki, hökmdən narazı qalan və apellyasiya şikayəti verən Laçın Əhmədağayev barəsində ən aşağı həddə cəza təyin olunmasını istəyib.
Zərərçəkmiş Sevinc Əhmədağayevanın hüquqi varisi də apellyasiya şikayəti verib. O, Laçın Əhmədağayevin ömürlük azadlıqdan məhrum olunmasını tələb edib.
Hər iki tərəfin şikayətinə Sumqayıt Apellyasiya Məhkəməsində baxılıb. Hakim Məhəmmədəli Rzayevin sədrliyi ilə keçirilən prosesdə qərar elan edilib.
Tərəflərin şikayətləri təmin olunmayıb.
Qeyd edək ki, Sumqayıt Ağır Cinayətlər Məhkəməsinin hökmü ilə Laçın Əhmədağayev 18 il müddətinə azadlıqdan məhrum edilib. Onun cəzasını ciddi rejimli cəzaçəkmə müəssisəsində çəkməsi müəyyən edilib.
İttihama görə, Laçın Əhmədağayev 2017-ci ildən rəsmi nikah münasibətində olduğu arvadı Sevincin son iki il ərzində ona başqa kişilərlə xəyanət etməsindən şübhələnib. Buna görə 28 aprel 2024-cü ildə yaşadıqları Xırdalan şəhərindəki evdə gün ərzində bir neçə dəfə həyat yoldaşı ilə mübahisə edib. Saat 21 radələrində növbəti mübahisə zamanı Sevincin ona aqressiv cavab verməsi səbəbindən xəyanət şübhələrinin əsaslı olması qənaətinə gəlib.
Mətbəxdən bıçaq götürən Laçın Əhmədağayev qonaq otağında dayanmış Sevincə yaxınlaşaraq ona zərbələr vurub. 32 bıçaq xəsarəti alan qadın hadisə yerində ölüb.
Qətl hadisəsi Sevincin üç yaşlı qızının gözləri qarşısında törədilib.
İstintaq orqanı tərəfindən Laçın Əhmədağayevin barəsində Cinayət Məcəlləsinin 120.2.4-cü (xüsusi amansızlıqla və ya təhlükəli üsulla adam öldürmə) maddəsi ilə ittiham elan edilib.
