Üçüncü uşağını qeysəriyyə üsulu ilə dünyaya gətirən 33 yaşlı Günay Məmmədovanın 13 gün komada qaldıqdan sonra vəfat etməsi ilə bağlı qardaşı açıqlama verib.
Bakuplus.az-ın əməkdaşı mərhum Günay Məmmədovanın qardaşı Vüsal Kərimli ilə danışıb.
O, bacısının həkim səhlənkarlığından dünyasını dəyişdiyini deyib:
“Məsuliyyətsizlik ediblər. Ona baxılmayıb. Əməliyyatdan sonra reanimasiyaya yerləşdirilməliydi. Lakin yerləşdirilməyib. Birbaşa palataya köçürülüb. Qanaxması baş verən zaman yanında heç kəs olmayıb. Təzyiqi yoxlanılmayıb. Bizi aldadıblar ki, qanaxmadan sonra ürəyi dayanıb. Reanimasiyaya buna görə apardıqlarını bildiriblər. Reanimasiya şöbəsinin müdiri bizə deyib ki, xəstə daxil olanda bədənində qan qalmamışdı. Sıfır faiz qan ilə gəlib. 25 dəqiqə də ürək fəaliyyəti dayanmış olub”.
V.Kərimli əlavə edib ki, "Yeni Klinika"nın uzman cərrah mama-ginekoloqu Sevinc Məmmədova qəribə açıqlama verib:
“Nağıl danışdı. Deyir ki, uşaqlığı yığılmırdı. Top qoyduq, ondan sonra qanaxma olub. Ekspertizaya vermişik. Rəy gözləyirik. Uşaq sağ-salamatdır. Bacımın böyük övladı sentyabrda məktəbə gedəcək. 6 yaşı olur. Üçü də oğlandır. Uşaqlar anasının öldüyünü bilmir”.
Nəzrin Vahid
