Bakının Binəqədi rayonu, Xocəsən qəsəbəsində sakinlər asfalt yola həsrət qalıblar. Bu haqda bu gün, 1 mart tarixində Bakuplus.az İctimai TV-yə istinadən xəbər verir.
Sözügedən qəsəbənin Həmid Sultanov küçəsində sakinlər uzun müddətdir ki, asfaltsız yollardan əziyyət çəkirlər. Yağışlı hava zamanı yollar palçığa bürünür, quru havada isə ərazini toz basır.
Vətəndaşlar bildiriblər ki, aidiyyəti qurumlara bir neçə dəfə müraciət ediblər, lakin problem öz həllini tapmayıb.
“Burada heç vaxt asfalt olmayıb, yollar həmişə belə vəziyyətdə olub. Biz işə gedib-gələ bilmirik, çox çətin olur. Avtomobillər belə buradan güclə keçirlər”, – deyə sakinlər şikayət edirlər.
Həmin qəsəbədə yoldan başqa, infrastruktur da yoxdur:
“Poliklinikalar və apteklər açılmalıdır, eləcə də məktəb pis gündədir. Yaşamaq çətindir”, – deyə sakinlər əlavə ediblər.
Binəqədi Rayon İcra Hakimiyyətindən (RİH) bildirilib ki, sözügedən vəziyyətdən xəbərləri var.
Binəqədi RİH-nin nümayəndəsi Leyla Quliyevadan verilən məlumata görə, qeyd edilən ünvanda yolların əsaslı təmir edilməsi üçün müraciət edilib və işlər mərhələli şəkildə həyata keçiriləcək.
