Aprel ayında uşaqlar üçün “Little YARAT” ustad dərsləri təşkil olunacaq. Bu haqda bu gün, 28 mart tarixində Bakuplus.az məlumat verir.
1 və 8 aprel tarixlərində, saat 12:00-da XX-XXI əsrlər Azərbaycan Rəngkarlığı Muzeyində Elnarə Nəsirli tərəfindən “Yer kürəsinə ismarıc” dərsi təşkil olunacaq. İncəsənəti və botanika elmini birləşdirən ustad dərsi iştirakçılara kətan üzərində toxum və əlaltı incəsənət ləvazimatları ilə elmi təcrübə aparmaq imkanı verəcək. Bununla da iştirakçılar bitkilərin "ünsiyyət qurma" bacarığını müşahidə edəcək və incəsənət vasitəsilə Yer kürəsinə yaradıcı mesaj ötürəcəklər.
2 aprel saat 12:00-da “YARAT” mərkəzində Emin Mathers “Ulduz axtarışında” mövzusunda görüşü idarə edəcək. İştirakçılar təbiət elementlərinin tekstura və quruluşlarını teleskop vasitəsilə müşahidə edərək, kəşf etdikləri unikal görüntülərin fotoşəkillərini çəkəcəklər. Bununla da onlar təbiətin kainatı özündə necə əks etdirdiyinin şahidi olacaqlar.
9 aprel saat 12:00-da “YARAT” mərkəzində Fidan Abilovanın “Parça-parça rənglər” adlı dərsi təşkil olunacaq. İştirakçılar ustad dərsində rəssam Vahap Avşarın cari sərgidə nümayiş olunan əsərinə istinad edərək, parçalardan unikal kollaj kompozisiyası yaradacaqlar.
Daha bir master-klas 16 aprel saat 12:00-da baş tutacaq. Dərsin müəllifi Aytac Aydınovadır. Ustad dərsində iştirakçılar fərdi olaraq karton və boyalardan planetlər düzəldəcəklər, daha sonra isə qrup şəklində planetləri birləşdirərək, Günəş sistemini yaradacaqlar.
Qeydiyyat üçün ələqə nömrəsi: 050 246 92 92 (YARAT Mərkəzi), 050 251 41 15 (Rəngkarlıq Muzeyi). Qeydiyyat çərşənbə axşamından cümə gününə qədər saat 11:00-dan 18:00-dək aparılır. Yerlərin sayı məhduddur.
