Yasamal rayonunda avtobus çatışmazlığı sakinlərə çətinlik yaradır. Bu haqda 3 iyun tarixində Bakuplus.az ARB24-ə istinadən xəbər verir.
Yeni Yasamal massivinin sakinləri metroya gəlmək üçün 77 nömrəli avtobusdan istifadə edir. Lakin nəqliyyat vasitəsinin sayının az olması səbəbindən sərnişinlər narahatlıqla metroya çatırlar.
Avtobusun hərəkət qrafikini nizamlayan şəxs deyir ki, daşıyıcı şirkət Yeni Yasamalın sıx olduğunu nəzərə alıb, sözügedən marşrut xətti üzrə avtobuslar maksimuma çatdırılıb.
“Hər xətdə 14-15 avtobus olanda, burada onların sayı 25-ə çatdırılıb. Əlavə 10 avtobus veriblər ki, insanlar rahat gedib gəlsin. Onların arasındakı interval 4 dəqiqədir. Səhər saat 07:30-dan 3 dəqiqə ilə göndəririk maşınları, sonra isə 4 dəqiqə ilə davam edirik”, - avtobus dispetçeri Elməddin Allahverdiyev bildirib.
Faktla bağlı Bakı Nəqliyyət Agentliyi bildirir ki, Yeni Yasamal yaşayış sahəsi üzrə təhlillər aparılaraq sərnişin tələbatı araşdırılıb. 77 nömrəli marşrut üzrə vətəndaşlardan daxil olan müraciətlər nəzərə alınmaqla həmin yaşayış sahəsini şəhərin digər əraziləri ilə əlaqələndirən marşrut xəttinin təşkili nəzərdə tutulub. Eyni zamanda marşrut xəttinin nizamlı fəaliyyətinin təmin olunması ilə bağlı dəfələrlə daşıyıcıya xəbərdarlıq edilib.
