Paytaxtın Yasamal rayonunda Mirzəağa Əliyev küçəsində yerləşən yaşayış binalarının birində yerləşən şirniyyat evindən yayılan qoxu sakinlərin narahatlığına səbəb olub. Bu haqda AzTv reportaj hazırlayıb.
Sakinlərin sözlərinə görə, şirniyyat evinin mətbəxində hazırlanan yeməklərin iyini sakinlər mənzillərində hiss edirlər. Nəticədə sakinlər pəncərələri aça bilmirlər.
Obyektin təsisçisi Samir Mustafayev deyib ki, o, havalandırma sistemi qursa da, mənzil idarəsi yuxarı mərtəbələrə boru çəkməyə icazə verməyib. Buna görə də havalandırma borusu obyektdən 15 metr aralıdadır.
Əmlak üzrə ekspert, Nüsrət İbrahimovun sözlərinə görə, çoxmənzilli yaşayış binasının birinci mərtəbəsində yerləşən qeyri-yaşayış sahələri sakinlərin yaşayışına maneə olmamalıdır.
Ekologiya və Təbii Sərvətlər Nazirliyindən bildirilib ki, hazırda restoran və mağazalarda səs-küy və tüstülənmə aşkarlanması ilə bağlı tədbirlər görülür. Qida təhlükəsizliyi agentliyində cavab verilib ki, qurum yalnız belə yerlərdə yeməklərin hazırlanması üçün sanitar şəraitə cavabdehdir. Səhiyyə Nazirliyinin Gigiyena və Epidemiologiya Mərkəzi, eləcə də Fövqəladə Hallar Nazirliyi hadisəyə görə məsuliyyət daşımadıqlarını bildiriblər.
