Yasamal rayonunda yaşayış evinin üzərində qaldırıcı kran quraşdırılıb. Bu haqda 10 mart tarixində Bakuplus.az Bakutv-yə istinadən xəbər verir.
Badamdar qəsəbəsi, Mikayıl Müşfiq küçəsi, M1, ev 2 ünvanında yaşayan sakinlər günlərini qorxu içərisində keçirir. Çünki yaxınlıqda tikinti işləri gedir və sakinlərin yaşadığı evin üzərində qaldırıcı kran quraşdırılıb. Küçə sakini Aytəkin Vəliyeva bildirib ki, bu hal onlar üçün təhlükə mənbəyinə çevrilib.
Tikinti şirkətinin vəkili bildirib ki, sakinlərin qaldırıcı kranın evin üzərində hərəkət etməsi ilə bağlı şikayətləri əsassızdır.
“Özünü mülkiyyətçi kimi qeyd edən şəxsin orada yaşadığı ev qanunsuz tikilidir. Bizim, Kristal F MTK olaraq həmin əraziyə sərəncamımız, əsaslandırmamız olduğundan, həmin qanunsuz tikintini sökdürmək səlahiyyətimiz var. Lakin biz bunu etmirik, həmin şəxsdən bizimlə razılaşmasını istəyirik və yeni tikiləcək binadan mənzil təklif edirik. Ancaq şikayətçi bizdən ağlasılmaz məbləğlər tələb edir, tikintinin davam etməsinə mane olacaq hərəkətlərə yol verir”, - vəkil bildirib.
Əraziya FHN əməkdaşları baxış keçirib və apardıqları araşdırmanın nəticəsi olaraq həmin kranın yaşayış evinin üzərindən hərəkət etməsini təhlükəli hal kimi qiymətləndirərək akt tərtib ediblər. Nəticədə kranın hərəkəti dayandırılıb.
