Paytaxtın bir çox ərazisində quraşdırılan yeni növ dayanacaqlarda kondisionerlər işləmir. Vətəndaşlar, xüsusən yay aylarında bu dayanacaqlardan istifadə etmək istəsələr də, soyutma sisteminin işlək vəziyyətdə olmaması oinların işini çətinləşdirir. Bu da ciddi narazılığa səbəb olur. Bu haqda bu gün, 27 iyul tarixində Bakuplus.az Space TV-yə istinadən məlumat verir.
Vətəndaşlar deyirlər ki, isti havanın içəri keçməsi ilə əlaqədar sərnişinlər dayanacaqda deyil, günün altında, ya da kölgəlikdə avtobus gözləməyə məcbur olurlar.
Məsələ ilə bağlı Yerüstü Nəqliyyat Agentliyindən (AYNA) bildirildi ki, dayanacaqlar yeni qoyulduğu üçün işlək vəziyyətə gətirilməsi bir az zaman alır. Bu səbəbdən də müəyyən işlər başa çatana qədər sərinləndirmə sistemində çətinliklər yaranır.
“Qeyd olunan ünvanlardakı smart tipli avtobus dayanacaq pavilyonları yeni qoyulub və texniki quraşdırma işləri tam yekunlaşmayıb. İşlər yaxın günlərdə tam yekunlaşdıqdan sonra pavilyonlardakı sərinləndirmə sistemi işlək olacaq”, - deyə AYNA-nın mətbuat katibi Tural Orucov qeyd edib.
