Yasamal rayonunun Yeni Yasamal yaşayış massivində yerləşən 12F saylı binanın sakinləri suyun çoxluğundan narazıdırlar. Bu haqda 12 aprel tarixində Xəzərxəbər məlumat verib.
Sakinlər iddia edirlər ki, 3-4 aydır binalarının qarşısındakı su anbarından gündə 300-400 ton su həyətə axılır. Çəkdiləri kiçik arxlar vasitəsi ilə suyu qismən də olsa kanalizasiya xətlərinə yönəltməyi bacaran sakinlər, məsələyə birdəfəlik son qoymaq istəyirlər.
Sakinlər bildirib ki, suyun qarşısını ala bilmədiklərindən binanın qarşısındakı qarajları da su basıb. Nəticədə bina sakinlərinə xeyli maddi ziyan dəyib. Bundan əlavə, sakinlər bildirib ki, su idarəsindən gələn əməkdaşlar, qarajların sökülməli olduğunu bildirib.
Azərsu ASC bildirib ki, məsələdən xəbərdardırlar. Həmin ərazidə, anbarın mühafizə zonasında, giriş xətləri üzərində avtomobil dayanacağı yaradılıb. Xəttin təmir edilməsi üçün əraziyə texnika cəlb edilməlidir. Bunun üçün dayanacaq ərazisində qazıntı və söküntü işləri aparılmalıdır. Bununla bağlı MTK rəhbərliyinə xəbərdaredici məlumat verilib, lakin MTK rəhbərliyi bunun üçün şərait yaratmır.
