Sabunçu rayonu, Zabrat qəsəbəsi, Babək küçəsində - qəsəbənin girəcəyində nəhəng və əzəmətli bina var. Sakinlərin dediyinə görə, bura əvvəllər ən çox sevilən istirahət yerlərindən biri olub. Bu haqda AZTV reportaj hazırlayıb.
“Birinci May” klubu vaxtilə Sabunçu rayonunun ən böyük mədəniyyət mərkəzlərindən biri hesab olunurdu. Mədəniyyət evi, ölkə müstəqillik qazanana qədər işləyirdi. İndi klub baxımsız vəziyyətdədir və heç bir fəaliyyət göstərmir.
Mədəniyyət mərkəzi 1920-1930-cu illərdə tikilib, rəqs klubu kimi fəaliyyət göstərmişdir, burada şənbə və bazar günləri müxtəlif filmlərin nümayişi, dərnəklər və kurslar təşkil edilmişdir. Bu, milli əhəmiyyətli mədəni tədbirlərin və konsertlərin keçirildiyi yerlərdən biri idi. Binanın içərisində kitabxana, sonra poçt, sonra bir müddət ön hissədə çayxana fəaliyyət göstərirdi.
Yerli sakinlərin sözlərinə görə, hazırda binada olmaq təhlükəlidir - ağac çürüyüb, dam örtüyü dağılır.
Dövlət Əmlak Xidmətindən verilən məlumata əsasən, qeyri-yaşayış binası 1993-cü ildə alqı-satqı müqaviləsi əsasında xüsusi mülkiyyətə keçib. 1997-ci ildə alıcıya mülkiyyət şəhadətnaməsi verilib.
Əmlak üzrə ekspert Ramil Osmanlının sözlərinə görə, özəlləşdirilən tikililərdən heç bir funksiyanın yerinə yetirilməsi tələb olunmur. Əgər onu özəlləşdirən tərəf ona pul yatırmaqda maraqlı deyilsə, bu, obyektin fiziki cəhətdən xarab olmasına gətirib çıxarır.
Hazırda paytaxtın bəzi ərazilərində köhnə sənaye obyektləri, məsələn, sosial xidmət müəssisələri, fabriklər var. Zamanla yüzlərlə insana xidmət edən, eyni zamanda iş yerləri yaradan bu yerlərin gələcəyi şübhə altındadır.
