Bakının Binəqədi rayonunda, 9-cu mikrorayonun “Zeytunluq” kimi tanınan ərazisində ağaclar kütləvi şəkildə quruyur.
Bu barədə Haqqın.az-a Binəqədi rayon sakinləri məlumat veriblər. Onlar bildiriblər ki, sakinlərin çoxsaylı şikayətlərindən sonra əraziyə asfalt döşənib, su təchizatı yenilənib, işıq dirəkləri, skamyalar, zibil qutuları quraşdırılıb. Amma zeytun ağaclarını xilas etmək mümkün olmayıb.
Sakinlər deyirlər ki, bu ağaclar may-iyun aylarında çiçək açır, zeytun isə oktyabr-noyabr aylarında yetişir, ancaq bu gün əksər ağaclarda nəinki meyvə, hətta yarpaq belə yoxdur. Bildirilib ki, ərazini təmizləmək üçün kol-kos yandırılıb, bu da ağacların qurumasına öz təsirini göstərə bilər. Yaxınlıqdakı mərasim evinin işçisi isə deyib ki, ağacları sulayan yoxdur: “İki ildir ki, burada işləyirəm, amma ağaclar həmişə bu vəziyyətdə olub. Mən heç vaxt onların sulandığını görməmişəm”.
Sakinlər ərazidə xeyli ticarət obyekti, villalar tikildiyini deyərək ağacların qurumasının təsadüf olmadığına işarə vurublar. Məsələ ilə bağlı Binəqədi rayon icra hakimiyyətinə ünvanlanan sorğuya cavab olaraq bildirilib ki, sözügedən ərazilərdə qeyd olunan problemlərin həlli üçün “bir neçə qurumla birgə kompleks proqramın həyata keçirilməsi nəzərdə tutulub”.
Ərazidən çəkilmiş fotoları təqdim edirik.
