Bakının bir sıra köhnə tikililərində kanalizasiya sularının bina altına dolması halları müşahidə olunur. Bu isə həm həmin binaların dayanıqlığına, həm də sakinlərin sağlamlığına ciddi təhlükə yaradır.
Avtosfer.аz xəbər verir ki, belə narahatedici vəziyyət paytaxtın Sabunçu rayonu, Zabrat qəsəbəsi, Abbas Səhhət küçəsində yerləşən iki mərtəbəli binalardan birində yaşanır. Redaksiyaya göndərilən videomaterialdan görünür ki, binanın zirzəmisi kanalizasiya suları ilə dolub və bu, artıq xroniki hala çevrilib.
Sakinlərin sözlərinə görə, onlar bu problem barədə aidiyyəti qurumlara dəfələrlə müraciət etsələr də, məsələ ilə bağlı hələ də heç bir ciddi tədbir görülməyib. Məcbur qalan sakinlər öz vəsaitləri hesabına borular çəkərək zirzəmidə toplanan çirkab suları kənara axıtmağa çalışırlar. Lakin bu, problemin köklü həlli demək deyil.
“İllərdir bundan əziyyət çəkirik. Evimizdə il ərzində azı iki dəfə təmir işləri aparmalı oluruq. Divarlarda nəmişlik yaranır, evin içini üfunət bürüyür. Üstəlik, bu rütubət müxtəlif xəstəliklərin yayılmasına da şərait yaradır,” – sakinlər bildirirlər.
Sakinlər məsələ ilə bağlı aidiyyəti dövlət qurumlarını təcili şəkildə tədbir görməyə çağırır və bu problemin aradan qaldırılması üçün kömək istəyirlər. Onların əsas tələbi kanalizasiya xətlərinin yenilənməsi və su basmış zirzəmilərin təmizlənməsidir.
