Əkinçi qəzetinin yaranması maarifçi Həsən bəy Zərdabinin adı ilə bağlıdır. O, qəzetin nəşrinə çətinliklə icazə alaraq, İstanbuldan ərəb qrafikalı mətbəə şriftləri gətirir. Qəzetin ilk nömrəsi 22 iyul 1875-ci ildə Bakıda nəşr edilir və bununla da milli mətbuatın əsası qoyulur.
O zamanlar İranda, Türkiyədə çap olunan qəzet və kitablar istifadə edilirdi və bu da dilimizdə xarici sözlərin, ifadə və tərkiblərin işlənməsi ilə nəticələnirdi. Bunun əleyhinə çıxan Zərdabi “Əkinçi”ni Azərbaycan dilində nəşr edirdi. Qəzet oxuyanların sayını artırmaq üçün o, çox vaxt nömrələri pulsuz paylayırdı. Həyat yoldaşı Hənifə xanım xatirələrində belə deyirdi:
“Bir dəfə fransız qəzetinin baş müxbiri Bakıya gəlib çıxmışdı...O, bütün Rusiyada Azərbaycan dilində çıxan yeganə qəzetlə maraqlanıb Həsən bəyin yanına gəlmişdi. Qəzetin üç il müddətində ancaq 300 abunəçisi olduğunu bilincə müxbir təəccüblə Həsən bəyə baxıb səmimi surətdə dedi: “Siz qəhrəmansınız, bizim Fransada bu cür yoxsul qəzetlər üçün işləyən adam tapılmaz... Görünür, siz öz xalqınızı çox sevirsiniz””. [Zeynalov N.N. Azərbaycan mətbuat tarixi I hissə. Bakı-1973]
“Əkinçi”nin əsas vəzifələrindən biri kənd təsərrüfatı sahəsində biliklərin, kənd təsərrüfatı alətlərinin tətbiqi haqqında müxtəlif məlumatların yayılması idi. Bundan əlavə, nəşr tibb, gigiyena, fiziologiya ilə bağlı çox sayda məsləhətlər verirdi. Ən əsas məqsəd isə adi bir müsəlmanın həyatını və düşüncəsini dəyişmək idi. Buna görə qəzetdə əhalinin geridə qalmasının səbəblərindən bəhs edən ciddi məqalələr dərc olunurdu. [Нигяр Джафарова. Все началось с “Экинчи”/ Наш век No 31(323). 2005]
1877-ci ildə Rusiya-Türkiyə müharibəsi başladığı zaman arxa cəbhədə “türk-tatar” dilində qəzetin mövcudluğundan ehtiyat edən Bakı qubernatoru Pozen həmin il sentyabrın 29-da “Əkinçi”nin nəşrinə rəsmən qadağa qoyur.
Qəzetin ümumilikdə 56 sayı işıq üzü görür.
İlk milli mətbuat orqanı olan “Əkinçi” qəzetinin birinci nömrəsinin çapdan çıxdığı gün - 22 İyul Azərbaycanda Mətbuat Günü kimi qeyd edilir. [https://portal.azertag.az/ru/encyclopedia/post/2074]
