Mir Əsədulla Mir Ələsgər oğlu Mirqasımov 17 noyabr 1883-cü ildə Bakıda anadan olub. O, ilk azərbaycanlı alim-cərrah, Azərbaycanda müasir tibb təhsili və elminin banisi olub.
Mir Əsədullanın atası oğlunun din xadimi olmasını istəyərək onu dini məktəbə göndərmişdir. Lakin Mir Əsədulla gizlicə rus dilini öyrənmiş və rus gimnaziyasına daxil olmuşdur. 1898-ci ildə o, Bakı şəhər gimnaziyasına daxil olur, 1908-ci ildə gimnaziya təhsilini başa vuraraq indiki Odessa Universitetinin tibb fakültəsinə daxil olur. [Azərbaycan Sovet Ensiklopediyası. VI cild, Bakı-1982]
1916-cı ildə Mirqasımov Bakıya qayıdır və burada hərbi lazaretdə (indiki 1 saylı Əzizbəyov adına doğum evi) cərrah işləyir. 1923-cü ildə o, Azərbaycan Dövlət Universitetinin tibb fakültəsində pedaqoji fəaliyyətə başlayır. 1927-ci ildə Mirqasımov doktorluq dissertasiyasını müdafiə edən ilk azərbaycanlı olur.
Mir Əsədulla 1929-cu ildə indiki BDU-nun tibb fakültəsinin xəstəxana cərrahiyyəsi kafedrasının professoru seçilmişdir. 1931-ci ildə o, kafedra müdiri təyin edilmiş və ömrünün sonuna kimi bu vəzifəni tutmuşdur. Mirqasımov 1933-cü ildə nəşr olunmuş, cərrahlıq sahəsində Azərbaycan dilində yazılmış ilk “Ümumi cərrahiyyənin qısa kursu” adlı dərsliyin müəllifidir. [М.А.Мир-Гасымов / 1883-1958 : библиография. Баку-1964]
O, 1945-1947-ci illərdə Azərbaycan SSR EA-nın ilk prezidenti olmuşdur, lakin gözlənilmədən bu vəzifədən uzaqlaşdırılmışdır. Buna səbəb Mircəfər Bağırovun ona Kommunist Partiyasına üzv olmaq təklifindən imtina etməsidir. O, filarmoniyada keçirilən iclasda belə cavab vermişdir: “Bu, mümkün deyil, yoldaş Bağırov...Mən bir dəfə and içmişəm, o da Hippokrat andı. Həm də mən Allaha inanıram”.
Bağırov məhkum edildikdən sonra akademik Mirqasımovun hüquqları yenidən bərpa edilib.
[https://sitat.news/bagirov-partiyaya-nifret-eden-akademiki-bu-cur-cezalandirdi-tarix]
1956-cı ildə akademik Mirqasımov Ümumdünya Cərrahlar Assosiasiyasının üzvü seçilmişdir.
Mir Əsədulla Mirqasımov 20 iyul 1958-ci ildə Bakıda vəfat edib, I Fəxri Xiyabanda dəfn olunub.
[https://science.gov.az/az/forms/byivshie-prezidentyi/167]
Mirqasımov dəfələrlə SSRİ Ali Sovetinin deputatı seçilmişdir, “Lenin”, iki dəfə “Qırmızı Əmək Bayrağı” ordenləri və bir çox medallarla təltif edilmişdir. Bakının Nəsimi rayonunda alimin adını daşıyan küçə var.
