Əbdülkərim Əli oğlu Əlizadə 11 yanvar 1906-cı ildə Bakıda, Bilgəh qəsəbəsində anadan olub.
Əlizadə Tehranda ibtidai təhsil alıb, fars və ərəb dillərini öyrənib. O, 1918-ci ildə Bakıya qayıdıb, əvvəl xüsusi orta məktəbdə oxuyub, 1926-cı ildə isə fəhlə fakültəsini bitirib. Əlizadə 1927-1930-cu illərdə Leninqrad (indiki Sankt-Peterburq) Şərq İnstitutunda təhsil alıb, 1935-1941-ci illərdə həmin institutda, SSRİ Elmlər Akademiyasının (EA) Şərqşünaslıq İnstitutunda və Leninqrad Dövlət Universitetində çalışıb.
O, 1954-cü ildə tarix elmləri doktoru elmi dərəcəsini almış, bir il sonra isə Azərbaycan EA-nın həqiqi üzvü seçilmişdir. [http://lib.az/persons/22]
Əlizadə 1941-1963-cü illərdə SSRİ EA Azərbaycan filialının Tarix İnstitutunda baş elmi işçi, direktor, Tarix və Fəlsəfə İnstitutunun qədim və orta əsrlər tarixi şöbəsinin rəhbəri, Azərbaycan EA İctimai Elmlər Bölməsinin akademik-katibi vəzifələrində çalışır. O, 1958-1963 illərdə Azərbaycan EA Şərqşünaslıq İnstitutunun ilk direktoru olur. Əlizadə 1963-cü ildən ömrünün sonuna kimi Azərbaycan EA Şərqşünaslıq İnstitutunun Mətnşünaslıq və məxəzləri çapa hazırlama şöbəsinə rəhbərlik etmişdir. [Azərbaycan Milli Elmlər Akademiyasının üzvləri haqqında məlumat kitabı. Bakı-2005]
Akademik Əlizadə şərqşünas İ.P.Petruşevski ilə birlikdə Azərbaycanın orta əsrlər tarixşünaslığının əsasını qoymuşdur. O, Azərbaycanın və Yaxın Şərq ölkələrinin Səlcuqlar və monqollar dövrü tarixinin tədqiqatçısıdır. Alimin 1956-cı ildə rus dilində nəşr olunmuş “XIII–XIV əsrlərdə Azərbaycanın sosial-iqtisadi və siyasi tarixi” adlı monoqrafiyası və 60-dan artıq elmi məqaləsi Azərbaycanın və Şərq ölkələrinin orta əsrlər tarixinin öyrənilməsində rol oynamışdır.
1960-cı illərdə akademikin rəhbərliyi ilə A.Bakıxanovun “Gülüstani-İrəm” əsərinin elmi-tənqidi mətni hazırlanır və 1970-ci ildə Bakıda nəşr olunur. Bu əsər fars, rus, ingilis, alman dillərində də çap olunur. [Azərbaycan Sovet Ensiklopediyası. IV cild. Bakı-1980]
Əlizadə elmi xidmətlərinə görə SSRİ Dövlət Mükafatına, Əməkdar elm xadimi fəxri adına Azərbaycan SSR Dövlət Mükafatına layiq görülmüş, “Qırmızı Əmək bayrağı”, “Şərəf nişanı” orden və medalları ilə təltif edilmişdir.
Əbdülkərim Əlizadə 3 dekabr 1979-cu ildə Bakıda vəfat edib və Bilgəhdə dəfn olunub.
