28 oktyabr 1995-ci ildə axşam saat 18:00 radələrində Bakı metropoliteninin “Ulduz” stansiyasından “Nərimanov” stansiyası istiqamətində hərəkət edən qatarda yanğın baş verib. Stansiyaların arasındakı tuneldə qatarın alışması nəticəsində 289 nəfər (126 qadın, 28 uşaq) həlak olub, 270 nəfər isə yaralanıb. Bununla bağlı ölkədə 3 günlük matəm elan olunub. Hadisə dünyada ən dəhşətli metro qəzası kimi “Ginnesin rekordlar kitabı”na daxil edilib.
Yanğının əsas səbəbi kimi köhnə avadanlıqlarla təchiz olunmuş qatarın nasazlığı və maşinistin səhv qərar verməsi göstərilib. Qatarın dartı mühərrikində baş vermiş alışma qısa bir zamanda digər vaqonlara da yayılıb. Özünü itirən maşinist yanan qatarı tuneldə saxlayıb, sərnişinlər isə vaqonlardan çıxıb qaçmağa çalışıblar.
Təxliyəsinin çətinləşməsi nəticəsində insanların çoxu həm qatarın içərisində, həm də tuneldə vaqonların yanmasından əmələ gələn zərərli maddələrdən zəhərlənib. Bir neçə nəfər vaqondan çıxandan sonra elektrik cərəyanı vurması nəticəsində dünyasını dəyişib.
Həlak olanların sırasında yanğının söndürülməsi ilə məşğul olan bir neçə xilasedici də olub. Sərnişinlərdən biri, hadisə nəticəsində həlak olmuş Çingiz Babayev digər sərnişinləri xilas etdiyinə görə Azərbaycanın Milli Qəhrəmanı fəxri adına layiq görülüb, kursantlar: 15 yaşlı Nicat Mürvət oğlu Səfərov, hələ 17 yaşı tamam olmamış Ruslan Məmməd oğlu İsayev və Samir Nadir oğlu Məmmədov “İgidliyə görə” medalı ilə təltif olunublar. “Ulduz” metro stansiyasında Çingiz Babayevin büstü qoyulub.
