Azərbaycanın hərbi-hava qüvvələrinin təşkilinə dair ilk addımlar hələ 1919-cu ildə, AXC dövründə edilmişdir. Hərbi nazir Səməd bəy Mehmandarov 22 yanvar 1919-cu ildə Azərbaycanın Gürcüstandakı nümayəndəsi Məmməd Yusif Cəfərova məktubla müraciət edərək, azərbaycanlıların Tiflisdəki Aviasiya məktəbinə göndərilməsini müzakirə etdi. Həmin il Azərbaycan-Gürcüstan hərbi əməkdaşlıq müqaviləsi bağlandıqdan sonra Azərbaycandan bir qrup əsgər və zabit Gürcüstana ezam olundu. Onlardan 9 nəfəri hərbi təyyarəçi peşəsinə yiyələnməli idi. Həmin zabitlər kapitan Firidun Mirzə Qacar, praporşiklər: Əlihüseyn Dadaşov, Teymur Mustafayev, Gəncinski, Həsənzadə və Qaraşarov idi.
Növbəti addımlardan biri ordunun hərbi-hava strukturunun rəhbərliyinin müəyyənləşdirilməsi oldu. Hərbi nazirin 1919-cu il 19 avqust tarixli əmri ilə podporuçik Teymur xan Əfşar aviasiya dəstəsinin rəis müavini təyin edildi. Sentyabrın 14-də aviasiya dəstəsinin ştatı təsdiq olundu. Ştatda 5 zabit, 4 məmur, 54 nizami əsgər və 4 qeyri-nizami əsgər var idi. Həmçinin 1920-ci ildə Azərbaycanda hərbi təyyarəçilər məktəbinin açılması qərara alındı. Səməd bəy Mehmandarov aviasiya məktəbində tədrisin təşkili üçün İngiltərədən və İtaliyadan təcrübəli mütəxəssislərin dəvət olunmasını müzakirə edirdi. Lakin 1920-ci ilin aprel işğalı hərbi-hava qüvvələrinin möhkəmləndirilməsi sahəsindəki işləri yarımçıq qoydu.
[Azərbaycan Xalq Cümhuriyyəti Ensiklopediyası: I cild. Bakı-2004]
Azərbaycan müstəqilliyini yenidən əldə etdikdən sonra - 14 fevral 1992-ci ildə Milli Ordunun Hərbi Hava Qüvvələri ayrıca bölmə kimi təsis olunub. Həmin il bu qurumun strukturu milliləşdirilib. General-mayor Rail Rzayev HHQ-nin komandanı təyin edilib. Daha sonra HHQ Hava Hücumundan Müdafiə Qoşunları ilə birləşdirilib. 1997-ci ildə Azərbaycanın Ali Hərbi Təyyarəçilik Məktəbi ilk milli hərbi təyyarəçilərin buraxılışına başlayıb.
Hazırda Azərbaycan HHQ-nin pilotları MDB məkanında ən çox uçuşlar keçirmiş pilotlar sayılır. Azərbaycan pilotları, əsasən, Azərbaycan Ali Hərbi Təyyarəçilik Məktəbində hazırlanır, Türkiyə, Ukrayna, ABŞ və digər ölkələrdə müvafiq ixtisasartırma kursları və təlimlər keçirlər.
[https://ordu.az/az/news/127103/bu-gun-herbi-hava-quvveleri-gunudur]
