Nəsir Əsədulla oğlu İmanquliyev 22 dekabr 1911-ci ildə Bakı şəhərində anadan olub.
O, tələbəlik illərindən “Kommunist”, “Yeni yol”, “Gənc işçi” qəzetlərində çalışıb. İkinci dünya müharibəsi illərində İmanquliyev siyasi işçi kimi Krım cəbhəsinə göndərilib, orada “Vuruşan Krım” qəzetinin məsul katibi olub, eyni zamanda hərbi hissədə tərcüməçi işləyib.
Sovet dövründə, ağır senzura şəraitinə baxmayaraq, İmanquliyev hər zaman peşəyə sədaqət fikrini jurnalist üçün prioritet hesab edirdi: “Jurnalist dəqiq, qərəzsiz, vicdanlı olmalıdır. Ürəyinin səsinə qulaq asmalıdır, peşəsini kiminsə pul kisəsindən asmamalıdır”.
1947-ci ildə Nəsir bəy Bakı Dövlət Universitetində pedaqoji fəaliyyətə başlayıb və ömrünün sonuna kimi burada çalışıb. 1958-ci ildə Imanquliyev “Bakı” qəzetini, 1963-cü ildə isə həmin qəzetin rus versiyasını yaradıb və uzun illər bu iki qəzetin baş redaktoru vəzifəsində çalışıb. 1990-cı ildə “Əməkdar jurnalist” fəxri adına layiq görülüb.
Nəsir İmanquliyev 7 mart 1998-ci ildə Bakıda vəfat edib və Birinci Fəxri xiyabanda dəfn olunub. Yaşadığı binaya (Nizami küçəsi 66) onun xatirə lövhəsi vurulub.
