Nəsibə Cahangir qızı Zeynalova 20 aprel 1916-cı ildə Bakı şəhərində anadan olub.
Atası Cahangir Zeynalov tacir, aktyor və Azərbaycan milli realist aktyor məktəbinin banilərindən biri idi. 1918-ci ilin mart hadisələri zamanı Cahangir ailəsi ilə İrana köçür. Bir müddət sonra ailə Bakıya qayıdır, lakin atası xəstəliyə tutulur və rəhmətə gedir.
Nəsibə xanım orta məktəbdə oxuyanda rəqqasəlik edib. Yaradıcılıq fəaliyyətinə dövlət filarmoniyasında rəqqasə kimi başlasa da, bu cəhdi uğursuz olub. 14 yaşında ailəsinə kömək etmək üçün o, orta təhsilini yarımçıq qoyur və Bakı elektrik şəbəkəsində, tramvay parkında tabelçi, topdan satış anbarında fəhlə işləyir. [Aydın Kazımzadə. Səhnəmizin və ekranımızın Qayınanası. Mədəniyyət.- 2010.- 22 sentyabr.- S. 13.]
Nəsibə xanım 1932-ci ildə rejissor Rza Təhmasibin dram dərnəyinə üzv olur, 1937-ci ildə isə Bakıda fəaliyyət göstərən səyyar Kolxoz və Sovxoz Teatrında aktrisa işləməyə başlayır. 1938-ci ildən o, yenicə yaranan Azərbaycan Dövlət Musiqili Komediya Teatrının truppasında birinci dərəcəli aktrisa kimi fəaliyyət göstərməyə başlayır. Həmin il Bakı Teatr Məktəbinə daxil olaraq aktyorluq təhsilini alır. [İradə Əliyeva. Hər xalqa nəsib olmayan Nəsibə xanım. Azərbaycan.- 2016.- 26 oktyabr.- S. 7.]
1949-cu ildə Musiqili Teatr müvəqqəti olaraq bağlanıb və aktrisa həmin ildən Bakıdakı Nizami adına kinoteatrın yay zalında kassir, Əzizbəyov adına mədəniyyət sarayında qrim ustası, Filarmoniyanın estrada bölməsində aktrisa işləyib. 1956-cı ildə Musiqili Teatr yenidən açılıb və Nəsibə xanım oraya qayıdıb.
Aktrisa teatrda “Hicran” (Qızbacı), “Qayınana” (Cənnət), “Ulduz” (Züleyxa), “Gözün aydın” (Nargilə) və s. kimi tamaşalarda rolların ifaçısı olub. Nəsibə xanım “Bəyin oğurlanması” (Əsli xala), “Bizim Cəbiş müəllim” (Suğra xala), “Qayınana ”(Cənnət xala), “Ögey ana” (Fatmanisə), “Ulduz” (Züleyxa) və s. filmlərdə müxtəlif obrazları canlandırıb. [Rəhimli İ.Ə. Nəsibə Zeynalova. Bakı-2017]
Səhnə yaradıcılığına görə Nəsibə Zeynalova 1960-cı ildə respublikanın “əməkdar artisti”, 1967-ci ildə “xalq artisti” adına, 1974-cü ildə Azərbaycan SSR Dövlət Mükafatına layiq görülüb.
Nəsibə Zeynalova 10 mart 2004-cü ildə Bakıda vəfat edib və Birinci Fəxri xiyabanda dəfn olunub.
