Tofiq Quliyev 1929-cu ildə Azərbaycan Dövlət Konservatoriyasının nəzdindəki peşə məktəbinə daxil olmuşdur. 14 yaşında şair Mirzə Ələkbər Sabirin «Uşaq və buz» şeirinə «Dərsə gedən bir uşaq» mahnısını bəstələmişdir.
Quliyev 1934-cü ildə Azərbaycan Dövlət Konservatoriyasına daxil olub. 1934-1935-ci illərdə Bülbülün rəhbərliyi ilə təşkil olunmuş Elmi-Tədqiqat Musiqi Kabinəsində, xalq musiqi nümunələrinin toplanılması və notlaşdırılması sahəsində aparılan tədqiqat işlərində iştirak edib. O, tarzən Mirzə Mansur Mansurovun ifasında “Rast”, “Segah-zabul” muğamlarını nota köçürüb.
Sənətkar 1935-ci ildə Azərbaycan Dram Teatrında orkestrin rəhbəri, dirijor vəzifəsində çalışıb. 1936-cı ildə Çaykovski adına Moskva Konservatoriyasının dirijorluq fakültəsində təhsilini davam etdirib. 1937-1939-cu illərdə Ümumittifaq caz orkestrində piano ifaçısı kimi fəaliyyət göstərib.
1939-cu ildə Tofiq Quliyev Moskvada təhsilini dayandıraraq, Bakıya dönür və maestro Niyazi ilə birlikdə Azərbaycan Dövlət Estrada orkestrini yaradır.
1941-ci ildə Tofiq Quliyevin rəhbərliyi ilə çıxış edən orkestr milli cazın təməlini qoydu. Tofiq Quliyev Azərbaycanın estrada və caz musiqinin banisi kimi tanındı. 1941-ci ildə, İkinci dünya müharibəsi zamanı, orkestr 402-ci diviziyanın tərkibinə daxil olaraq, döyüşlər gedən Krasnodar, Mozdok, Kerç şəhərlərində cəbhənin ön xəttində konsert proqramları ilə çıxış edirdi.
Tofiq Quliyev 40-dan artıq kinofilmin musiqisinin müəllifi olmuşdur: “Səbuhi”, “Bəxtiyar”, “Görüş”, “Qızmar günəş altında”, “Dərviş Parisi partladır” və s.
Nailiyyətlərinə görə Quliyev “Azərbaycanın SSR Əməkdar İncəsənət xadimi”, “Azərbaycan SSR Xalq artisti” fəxri adılarına layiq görülmüşdür, “Qırmızı Əmək Bayrağı”, “İstiqlal” ordenləri ilə təltif olunmuşdur.
Tofiq Quliyev 4 oktyabr 2000-ci ildə Bakıda vəfat edib və I Fəxri Xiyabanda dəfn olunub.
Mənbələr:
