SSRİ xalq artisti Müslüm Məhəmməd oğlu Maqomayev 17 avqust 1942-ci ildə Bakıda anadan olub. Bakı Konservatoriyasının musiqi məktəbində (indiki Bülbül adına Musiqi Məktəbi) fortepiano və bəstəkarlıq ixtisası üzrə təhsil almışdır. 1956-1959-cu illərdə Asəf Zeynallı adına Bakı Musiqi Kollecində təhsilini davam etdirmişdir.
Azərbaycan-sovet opera və estrada müğənnisi Müslüm Maqomayev haqqında 5 maraqlı faktı təqdim edirik:
- Müslüm Maqomayevə Azərbaycanın məşhur bəstəkar və dirijoru olan babasının adı verilmişdir.
- Bir vaxtlar Müslüm Maqomayevin xaricdə opera müğənnisi kimi karyera qurmaq imkanı var idi: ona İtaliyanın məşhur Teatro alla Scala-da və Moskvanın Bolşoy Teatrında işləmək təklifi edilmişdir. Lakin o, bu təklifləri qəbul etməmişdir.
- Heydər Əliyev Maqomayevi musiqi sənətinin canlı əfsanəsi və babasının qoyduğu ənənələrin layiqli davamçısı adlandırmışdır. Məhz Heydər Əliyevin SSRİ siyasi xadimi Leonid Brejnevə müraciəti sayəsində Müslüm Maqomayevə 31 yaşında SSRİ xalq artisti adı verilmişdir.
- 1972-ci ildə Müslüm İranın sonuncu şahı Məhəmməd Rza Pəhləvinin qarşısında çıxış etmişdir. Şah tamaşanı o qədər bəyənmişdi ki, ona pulnan təşəkkür etmək istəyib. Maqomayev pulu götürməkdən imtina etmişdir. Bundan sonra, şah ona qızıl üzük hədiyyə etmişdir.
- Uzun müddət Muslüm Maqomayev SSRİ-də ingilis dilində oxumağa icazə verilən yeganə müğənni idi.
Maqomayev 25 oktyabr 2008-ci ildə Moskvada, ürək tutmasından vəfat edir. O, Bakıda Birinci Fəxri Xiyabanda dəfn edilmişdir. 25 oktyabr 2009-cu ildə Krasnoqorskda (Rusiya) Müslüm Maqomayevin adına konsert zalı açılmışdır. 2010-cu ildə biznesmen Araz Aqalarov (Müslümün yaxın dostu olmuşdur) tərəfindən Müslüm Maqomayevin Mədəni-Musiqi İrsi Fondu yaradılmışdır. Moskva və Kiyev meydanlarına müğənninin adı verilmişdir. Onun şərəfinə Azərbaycanda və Rusiyada küçələr adlandırılmışdır, abidələr ucaldılmışdır.
