Dadaşov uşaq yaşlarından musiqi ilə məşğul olub, kontrabasda ifa edib. O, orta məktəbi bitirdikdən sonra Azərbaycan Tibb Universitetinə qəbul olunub, lakin birinci kursdan təhsilini yarımçıq qoyub.
Aktyor Böyük Vətən müharibəsində iştirak edib. 1943-cü ildə aldığı kontuziyaya görə qeri qaytarılır və müalicə alır. Müalicədən sonra hərbi hissələrdə musiqiçi kimi fəaliyyət göstərir. Müharibədən sonra o, indiki Azərbaycan Dövlət Mədəniyyət və İncəsənət Universitetinə daxil olur. Aktyor teatr fəaliyyətinə Zaqatala teatrında başlayır.
[Mehdi Mükərrəmoğlu. Xarakterik rolların nadir ifaçısı// Xalq qəzeti.- 2009.- 23 iyun.- S. 7.]
Aktyor “Fəryad”, “Axırıncı aşırım”, “Dəli Kür”, “Uşaqlığın son gecəsi” kimi filmlərdə çəkilib. 1985-ci ildə o, “Müsahibə götürən adam” siyasi filmində Niyaz xan (Pakistanın əks-kəşfiyyat komissarı) obrazını yaradır. Niyaz xan onun obrazını yaradacaq insanı olümlə hədələyir və Məlik Dadaşovu Pakistana buraxmırlar. Filmin Pakistanda çəkilməli olan hissələri İçərişəhərdə lentə alınır. [https://modern.az/az/news/190572/rollarina-gore-hede-qorxu-ile-uzlesen-aktyor-melik-dadasovun-heyat-hekayeti-]
Dadaşov karyerası ərzində iki obrazı oynamaqdan imtina etmək istəyib: “Dəli Kür” filmində molla Sadiq rolunu dini inanclarına görə oynamaq istəmirdi . İkinci istəmədiyi rol isə “Fəryad” filmində düşmən erməni “Xaçaturyants” obrazı olub.
Erməni Xaçaturyants rolunu oynadığına görə bir gün işə gedərkən onu “Malakan” bağının yanında bir qadın görüb qışqırmağa başlayıb: “Ay camaat, bu adam ermənidir”. Yalnız sənədlərini təqdim etdikdən və aktyor olduğunu dedikdən sonra onu buraxıblar. Bu rola görə aktyoru Ermənistanda milli qəhrəman kimi qəbul etdilər. Məlik Dadaşov televiziyada çıxış edərək bu addan imtina etdi və dedi: “O adı heç vaxt və heç cür özümə yaraşdıra bilmərəm. Bax buna görə mən bu rolu oynamaq istəmirdim. Bilirdim ki, nəticəsi bu ola bilər”.
[Xalq sevgisi onu unudulmağa qoymur//Azad Azərbaycan 28 dekabr 2019] [https://modern.az/az/news/190572/rollarina-gore-hede-qorxu-ile-uzlesen-aktyor-melik-dadasovun-heyat-hekayeti-]
Aktyor son illərində S.Vurğun adına Rus Dram Teatrında çalışırdı. 1980-ci illərdən Azərbaycan Dövlət Mədəniyyət və İncəsənət Universitetində aktyor sənətindən dərs də deyirdi. Məlik Dadaşov 1996-cı ildə tələbələrlə “Arşın mal alan”ı məşq edən zaman yıxılır və xəsarət alır. O, altı gündən sonra, 2 dekabr 1996-cı ildə xəstəxanada vəfat edir. Aktyor II Fəxri Xiyabanda dəfn olunub. [https://modern.az/az/news/190572/rollarina-gore-hede-qorxu-ile-uzlesen-aktyor-melik-dadasovun-heyat-hekayeti-]
