Vera Makarova 11 iyun 1911-ci ildə Bakıda, şəhərin vitse-qubernatoru Apollon Makarovun ailəsində anadan olub. Doqquz yaşında, Qırmızı ordunun Bakıya daxil olmasından sonra Vera valideynləri ilə birlikdə Fransaya köçmək məcburiyyətində qalıb. Ailəsi Parisdə məskunlaşıb.
26 yaşında Vera şahzadə Nikolay Obolenski ilə ailə qurur. 1940-cı ildə Fransanın faşistlər tərəfindən işğalından qısa müddət sonra Vera Obolenskaya gizli bir təşkilatın üzvü olur və burada "Viki" təxəllüsü ilə fəaliyyət göstərməyə başlayır. 1940-cı ilin sonunda, bu qrup başqa bir gizli təşkilatla birləşir və nəticədə yaranan ittifaq Vətəndaş və Hərbi Təşkilat adlandırılır. Onlar fransız generalı Şarl De Qolun Londondakı nümayəndələri ilə əlaqə qurub kəşfiyyatçı kimi fəaliyyət göstərirlər, xaricdəki ingilis əsirlərin qaçmasını təşkil edirlər. Tezliklə Vera həyat yoldaşı Nikolayı da təşkilatın üzvü edir.
1942-ci ildə təşkilatın sədri həbs edilir. 17 dekabr 1943-cü ildə isə Vikini də həbs edirlər. Obolenskaya Fransanın Fren həbsxanasına göndərilir. [http://izbrannoe.com/news/lyudi/vera-obolenskaya-knyaginya-nichego-ne-znayu/?fbclid=IwAR1cBCIQgDbksHoWQiE2st8FgtyL8oKc_Jbx3ZptY4wfSC7DWg-PD1mxVaQ]
Bir müddət sonra şahzadə Nikolay Obolenski də eyni həbsxanaya gətirilir. Viki uzun müddət "ayrıldıqları üçün" Nikolayın təşkilatla heç bir əlaqəsi olmadığını söyləyərək həyat yoldaşını xilas edir. Dəlil olmadığı üçün şahzadə sərbəst buraxılır.
Obolenskaya bundan sonra heç nə deməyəcəyini bəyan edir. Bu səbəbdən faşistlər ona "Princessin - ich weiss nicht" ("Heç nə bilmirəm şahzadəsi") ləqəbini verirlər. Vera Obolenskaya haqqında ölüm hökmü verilir və o, Berlindəki Plyotzenseye həbsxanasına aparılır. 4 avqust 1944-cü ildə, günorta saatlarında Viki həbsxananın həyətində gəzintiyə çağırılır və "ölüm otağına" aparılaraq gilyotinlə edam edilir. [Флам Л.С. Вики. Княгиня Вера Оболенская. Москва-2005]
Fransada müharibə qurbanlarının abidəsinin üzərində Veraya aid xatirə lövhəsi qoyulub. SSRİ onu ölümündən sonra, 1965-ci ildə Birinci dərəcəli Vətən Müharibəsi ordeni ilə təltif etmişdir.
