Mirzə Əbdülcabbar oğlu Babayev 16 iyul 1913-cü ildə Bakının Maştağa qəsəbəsində anadan olub.
O, Bakı Sənaye İnstitutunun (indiki ADNSU) memarlıq fakültəsində təhsil alıb. Mirzə Babayev 1948-ci ildə indiki Bakı Musiqi Akademiyasının vokal şöbəsinə qəbul olunub, burada müğənni Bülbülün sinfində təhsil alıb. Bülbül Mirzə Babayevi opera müğənnisi kimi hazırlamaq istəyirdi, lakin bəstəkar Tofiq Quliyevin dediyinə görə, onun səsi estrada mahnılarının ifası üçün daha uyğun olub. [Azərbaycan.-2013.-17 iyul.-S.6.] [https://kulis.az/xeber/media/olen-xaniminin-seklini-cibinde-gezdirdi-zeherlenib-sehnede-husunu-itirdi-mesedi-ibad-roluna-onu-cekmediler-40686]
Xalq artisti müxtəlif illərdə Dövlət Televiziya və Radio Verilişləri Komitəsinin estrada orkestrində, Dövlət Filarmoniyasında, Dövlət Konsert Birliyində çalışıb. Müğənni Azərbaycan Dövlət Caz Orkestrinin ilk solistlərindən biri idi. Azərbaycan bəstəkarlarının bir çox mahnıları onun ifasında məşhurlaşıb. [Azərbaycan.-2013.-17 iyul.- S.6.]
Mirzə Babayevin kino sənətinin inkişafında da rolu olub. O, 30-dan çox filmdə çəkilib. “Alma almaya bənzər”, “Qayınana”, “Bəyin oğurlanması”, “Dərviş Parisi partladır”, “Qaraca qız”, “Qorxma, mən səninləyəm”, “Telefonçu qız”, “Romeo mənim qonşumdur”, “Dəli Kür” və s. kimi filmlərin çəkilişlərində iştirak edib. [Olaylar.-2009.-18-20 iyul.-S.13.]
Bir çox Azərbaycan filmlərində mahnıları Mirzə Babayev ifa edib. O, “O olmasın, bu olsun” filmində Məşədi İbadın dilindən oxunan mahnıları ifa edib.
Müğənni Nizami Gəncəvi adına Azərbaycan Ədəbiyyat Muzeyinin tərtibatında iştirak edib. [Azərbaycan.-2013.-17 iyul.- S.6.]
Sənətkar Azərbaycan SSR-in Əməkdar artisti, Azərbaycan Respublikasının Xalq artisti, iki dəfə “Humay” mükafatı laureatı və Azərbaycan Respublikası Prezidentinin fəxri təqaüdçüsü olub. [https://metbuat.az/melumat/taninmis/58/mirze-babayev.html] [https://e-qanun.az/framework/985]
Mirzə Babayev 13 yanvar 2003-cü ildə Bakıda vəfat edib. O, İkinci Fəxri xiyabanda dəfn olunub. [https://medeniyyet.az/page/news/68792/Mirze-Babayevin-dogum-gununde-mezari-ziyaret-edilib.html] [Səs.-2011.-16 iyul.-S.12.]
