Əhməd Məmmədrzabəy Bakıxanov 5 sentyabr 1892-ci ildə Bakıda, tarixçi Abbasqulu ağa Bakıxanovun nəslindən olan zadəgan ailəsində anadan olub.
Bakıxanov ilk təhsilini 1905-ci ildə İranın Rəşt şəhərində mollaxanada almışdır. O, 1908-ci ildə İranın məşhur incəsənət xadimi Əbdülhəsənxandan musiqi təhsili almağa başlayır və qısa müddət ərzində tarda ifa etməyi öyrənir. 1912-ci ildə Bakıya qayıdan Bakıxanov burada “Səadət” məktəbinə daxil olur, 5 ildən sonra isə şəhər məktəbinə keçir. 1918-ci ildə o, mühasibat kursuna daxil olur, eyni vaxtda məşhur ustadlardan təhsil alır.
Sovet dövründə Bakıxanov evlərdə musiqi dərsi deməyə başlayır, 1926-cı ildən isə Bakının 1 saylı məktəbində işləyir. Bundan əlavə o, 27 saylı məktəbdə, Xəzər Gəmiçilik idarəsinin dənizçilər klubunda və başqa yerlərdə təşkil olunmuş bədii dərnəklərə rəhbərlik edib. Sənətkar 1927-ci ildə bəstəkar Üzeyir Hacıbəyovla tanış olur. O, Bakıxanovu 1930-cu ildə konservatoriyaya muğam dərsi deməyə dəvət edir. [Rəhmətov Ə.M. Əhməd Bakıxanov. Bakı-1977]
Əhməd Bakıxanov 1941-ci ildə Azərbaycan xalq çalğı alətləri ansamblını yaradır, kollektivin tərkibinə tar, saz, ud, kanon, qoşanağara, qaboy və fortepiano ifaçılarını daxil edir. Özü də ömrünün sonuna kimi ansambla rəhbərlik edir. Fatma Mehrəliyeva, Sara Qədimova, Zeynəb Xanlarova, Arif Babayev, Xan Şuşinski və s. görkəmli sənətkarlar bu ansamblın solistləri olublar. Ölümündən sonra sənətkarın xatirəsini əbədiləşdirmək məqsədilə ansambla Əhməd Bakıxanovun adı verilir.
Əhməd Bakıxanov Azərbaycan xalq musiqisinin, xüsusilə də muğamın tədrisinə və təbliğinə böyük töhfələr verib. Onun “Azərbaycan xalq rəngləri”, “Azərbaycan ritmik muğamları”, “Muğam, mahnı, rəng” adlı kitabları bu gün də musiqi məktəblərində əsas tədris materialları kimi istifadə olunur. [Savalan Fərəcov. Əhməd Bakıxanov xatirələr işığında // Mədəniyyət.- 2013.- 6 sentyabr.- S. 11.]
Sənətkar “Azərbaycan SSR Xalq artisti”, “Azərbaycan SSR Əməkdar incəsənət xadimi”, “Azərbaycan SSR Əməkdar müəllimi” fəxri adlarına layiq görülüb və “Şərəf nişanı” ordeni ilə təltif edilib.
Əhməd Bakıxanov 26 mart 1973-cü ildə vəfat edib və Bakının İkinci Fəxri xiyabanında dəfn olunub.
Musiqiçinin yaşadığı mənzildə Azərbaycan Musiqi Mədəniyyəti Dövlət Muzeyinin xalq çalğı alətləri şöbəsi fəaliyyət göstərir.
