Bağırov körpüsü Bakıda, Heydər Əliyev prospektində yerləşir. Körpü Azərbaycan SSR-in birinci katibi Mircəfər Bağırovun adını daşıyır. Dəmir yolu keçidi olan bu körpü 1955-ci ildə Bağırovun sifarişi ilə inşa edilib.
Buradan, əsasən, yük qatarlarının hərəkət etdiyi dəmir yolu xətti keçir. Körpünün tikintisinə qədər dəmir yolu yerlə salınmışdı və daim maneə yaradırdı.
Körpü - dəmir yolu keçidinin tikintisinə 1953-cü ildə başlanılıb. İnşanın səbəbi bir rəvayətlə bağlıdır. Deyilənlərə görə, bir gün Mircəfər Bağırov avtomobillə aeroporta gedərkən uzun müddət yoldan keçən qatarı gözləyərək gecikməsindən narahat olur və əsəbləşir. Nəhayət, şlaqbaum qalxır və sürücü maşını hava limanına tərəf sürür. Artıq təyyarəyə qalxan Bağırov onu yola salan müavinə üz tutub deyir: “Qayıdandan sonra körpü layihəsi hazır olsun...Anladın?!”
Beləliklə, körpünün layihəsi iki həftəyə hazır olur. Bağırov Moskvadan təcrübəli mütəxəssislər və materiallar gətirməyə nail olur. Tikintidə alman hərbi əsirlərinin və dustaqların da işlədiyi iddia edilir. [https://proza.ru/2016/12/22/2265]
Çuqun məhəccərlərlə, daş oymalarla işlənmiş daş körpü 1955-ci ildə hazır olur.
Körpü ilə bağlı ikinci əfsanə Bağırov körpüsünün necə sınaqdan keçirildiyini izah edir. Qədim zamanlarda hansısa şəhərdə körpünün layihəsini hazırlayan şəxs inşaatçılarla birlikdə körpünün istismara verilməsi zamanı mütləq onun altında dayanırdı və bununla da onun möhkəmliyinə zəmanət verirdi. Deyilənlərə görə, Bağırov körpüsü istifadəyə verilərkən partiya rəhbərliyinin göstərişi ilə layihəçilər və inşaatçılar körpünün altında dayanıblar. Bağırov körpüsü bu günə kimi Bakının ən dayanıqlı yol ötürücülərindən biri hesab edilir.
Başqa bir rəvayətə görə, Bağırov körpünün formasında və bəzəyində “M” şifrələməyi əmr etmişdir. [https://azerhistory.com/?p=27044]
2008-ci ildə Bağırov körpüsündə Türkiyənin “Kolin” şirkəti tərəfindən yenidənqurma işləri həyata keçirilib. [https://fed.az/az/neqliyyat/bakidaki-bagirov-korpusunun-yan-tunelleri-62-milyon-dollara-tikilibmis-foto-117506]
[URIS id=63296]
