Səttar Bəhlul oğlu Bəhlulzadə 15 dekabr 1909-cu ildə Bakının Əmircan qəsəbəsində anadan olub.
Bəhlulzadə 1927-1931-ci illərdə keçmiş Azərbaycan Dövlət Rəssamlıq Texnikumunda təhsil alıb. Yaradıcılığa “Kommunist” qəzetində rəssam Əzim Əzimzadənin rəhbərliyi altında başlayıb.
Burada o, müxtəlif mövzu və janrda qrafik rəsmlər çəkirdi. 1931-1933-cü illərdə qəzetdə onun müasir məzmunlu ilk karikaturaları çap olunub. [Azərbaycan Sovet Ensiklopediyası. Bakı-1979]
Bəhlulzadəni öz davamçısı kimi görən Əzim Əzimzadə Səttarın rəsm sahəsində ali təhsil almağını istəyib. Buna görə Səttar 1933-cü ildə Moskva Rəssamlıq İnstitutunun qrafika fakültəsinə daxil olub. Başqalarından fərqli olaraq rəssam diplom müdafiəsində bir yox, iki əsər hazırlayıb. Lakin Böyük Vətən müharibəsinin (1941-1945) başlaması ona diplomunu müdafiə etməyə imkan vermir və o, Bakıya qayıdır. Müharibədən sonra onu Moskvaya diplom müdafiəsi üçün dəvət etsələr də, o etiraz edir və belə cavab verir: “Məgər diplomsuz rəssam olmaq olmaz?”
Səttar Bəhlulzadə hisslərini gizlədən, qapalı, pul ilə maraqlanmayan insan olub. Əsərlərini heç vaxt sifarişlə yaratmayıb. Bu xasiyyətinə görə “Sonuncu dərviş” kimi tanınıb. [https://www.youtube.com/watch?v=YTHIV-QK6dE]
O deyərdi ki: “İlham və təbiət üçün Qogen kimi Taiti adasına getmədim və başqalarına bunu etməyi məsləhət görmürəm. Çünki insanların həyatı, doğma vətəni - əsl ilham mənbəyidir”. [https://www.azerbaijan-news.az/view-179355/tebietin-settar-rengi]
Səttar Azərbaycan boyakarlıq sahəsində mənzərə rəsminin banilərindən hesab edilir. Bəhlulzadənin “Xəzər gözəli”, “Əbədi məşəllər”, “Kəpəzin göz yaşları”, “Vətənimin baharı”, “Azərbaycan nağılı” kimi əsərləri var. Xalq şairi Bəxtiyar Vahabzadə rəssam haqqında belə deyirdi: “Bəhlulzadənin əsərlərinə baxarkən ana yurdumuzun gözəlliyinə və əzəmətinə bir daha vuruldum”. [Ələsgərov B. Boyalarda yaşayan ömür. Bakı-2009]
Dünyanın bir çox ölkələrində rəssamın sərgiləri keçirilib və əsərləri muzeylərdə eksponat kimi saxlanılır.
Bəhlulzadə “Qırmızı Əmək Bayrağı” ordeni, “Azərbaycan SSR əməkdar incəsənət xadimi”, “Azərbaycan SSR xalq rəssamı” fəxri adları ilə təltif olunub. [Azərbaycanın görkəmli şəxsiyətləri. Səttar Bəhlulzadə. Biblioqrafiya. Bakı-2009]
Səttar Bəhlulzadə 14 oktyabr 1974-cü ildə Moskvada vəfat edib. Vəsiyyətinə uyğun olaraq o, Əmircan qəsəbəsində, anasının yanında dəfn olunub.
