Leyla Bədirbəyli 8 yanvar 1920-ci ildə Bakıda anadan olub. Atası Şəmkir bəyləri nəslindən, anası isə şəmkirli Musa xanın qızı idi.
Uşaqlıqda Leyla anası ilə tez-tez rəqs dərnəyinə gedərdi, rəqsə maraq göstərərdi. Leyla 10 yaşında olarkən rus rejissoru Dziqa Vertovun “Lenin haqqında üç mahnı” adlı filmində “pioner qız”ın roluna çəkilmişdir. Bədirbəyli 1937-1942-ci illərdə Azərbaycan Dövlət Filarmoniyasının Mahnı və Rəqs ansamblında solist olub. 1937-ci ildə, “Dəcəl dəstə” filmində “pioner dəstə rəhbəri”, 1941-ci ildə “Səbuhi” filmində “Tubu” rollarında oynayıb. Məhz “Səbuhi” filmindən sonra aktrisa teatrda işləmək üçün dəvət alır.
[Гюльнара Джавадова. Лейла Бадирбейли - Настоящая Восточная Красавица…Бакинский рабочий.- 2010]
[Azərbaycan Sovet Ensiklopediyası - II Cild. Bakı-1979]
Bədirbəylinin teatrda ilk çıxışı M.İbrahimovun “Məhəbbət” tamaşasında “Zəhra” rolu olub. Teatr səhnəsində “Tufan”da “Klaşa”, “Pəri cadu” tamaşasında “Pəri”, “Vaqif”də “Gülnar” və “Xuraman”, “Xanlar”da “Mehriban” kimi rolları ifa edib. [Aydın Kazımzadə. Azərbaycan kinosunun simaları - Leyla Bədirbəyli. Mədəniyyət.- 2010]
1945-ci ildə Leyla Bədirbəyli Üzeyir Hacıbəyovun dəvəti ilə “Arşın mal alan” filmində Gülçöhrə obrazını canlandırmışdır. Onun gözəlliyini və ifasını bəyənən Stalin, Leyla Bədirbəylini “əsl şərq gözəli” adlandırmışdır. Akrisa 1946-cı ildə Stalin mükafatına layiq görülən Sovet İttifaqının üçüncü qadını olmuşdur. [Гюльнара Джавадова. Лейла Бадирбейли -Настоящая Восточная Красавица…Бакинский рабочий.- 2010]
Bundan əlavə, Bədirbəyli “Dəli Kür”, “Dərviş Parisi partladır”, “Fətəli xan”, “Görüş”, “Koroğlu” kimi filmlərdə baş rollarda çəkilib.
1995-ci ildə aktrisanın həyat yoldaşı xaricdə ağır yol qəzasında həlak olur, bir il sonra isə Leylanın böyük qızı yol qəzasında dünyasını dəyişir. Bu iki hadisədən sonra Leyla Bədirbəyli evə qapanır. Yalnız 1 yanvar 1999-cu ildə, Heydər Əliyev ona “İstiqlal” ordenini təqdim edərkən evdən çıxıb ictimaiyyət arasında görünür. [https://umayclub.com/goz%C9%99llik-simvolu-leyla-b%C9%99dirb%C9%99yli/]
Leyla Bədirbəyli 23 noyabr 1999-cu ildə, 79 yaşında vəfat edib. O, Bakıda Birinci Fəxri Xiyabanda dəfn olunub. Bakıda yaşadığı binanın divarına (Şəmsi Bədəlbəyli küçəsi, 84) onun xatirə lövhəsi qoyulub.
