Kərim Əli oğlu Kərimov 14 noyabr 1917-ci ildə Bakı şəhərində mühəndis-texnoloq ailəsində anadan olub.
Vaxtilə strateji dövlət orqanlarından birinə rəhbərlik etməsinə baxmayaraq, onun adı və siması uzun müddət gizli saxlanılırdı. SSRİ-nin bütün kosmik gəmilərinin heyətlərini Kərimov şəxsən özü kosmosa göndərirdi. Heyətlər uçuşa hazır olmaları və uçuşun uğurla başa çatması haqqında məruzələri ona edirdilər. Həmin hesabatların efirə verildiyi reportajlarda Kərimovun ancaq kürəyini göstərərdilər. Dövlət komissiyası sədrinin şəxsiyyəti barədə “Pravda” və “Sovetskaya Rossiya” qəzetlərinin 1987-ci ildə məlumat verməsindən sonra onun kimliyi üzə çıxır. [https://azerhistory.com/?p=12788]
1942-ci ildə Azərbaycan Sənaye İnstitutunu bitirən Kərimov, Artilleriya Akademiyasında öz təhsilini davam etdirib. 1946-cı ildən o, ballistik raketlərin radio-ölçü sistemlərinin yaradılması istiqamətində işlər aparıb və raketlərin daxili parametrlərinə nəzarət edən “Don” radio-ölçü sistemi yaradıb. Kərimov “Zenit” kəşfiyyat peyklərinin buraxılmasına şəxsən nəzarət edib. [https://science.gov.az/az/forms/skonchavshiesya-poch%D1%91tnyie-chlenyi/2642]
Sonralar o, “Molniya-1”, “Meteor” süni peyklərinin uçuşu üzrə dövlət komissiyasının sədri vəzifəsində çalışıb. 1961-ci ildə ilk dəfə Yuri Qaqarinin kosmosa uçuşu onun fəaliyyəti sayəsində mümkün olub. 1966-cı ildə Kərimov kosmik uçuşlar üzrə dövlət komissiyasının sədri vəzifəsinə təyin olunub. O, 25 il həmin komissiyanı idarə edib və bütün kosmik uçuşlara və başqa planetlərə kosmik raketlərin göndərilməsi haqda sonuncu qərarı verib.
Kosmosu tədqiq edən “Soyuz” raket daşıyıcılarının yaradılması, “Salyut” orbital stansiyasının qurulması Kərimovun rəhbərliyi altında həyata keçirilib. Məhz bu layihənin davamı kimi, kosmik fəzada çoxmodullu “Mir” orbital stansiyası yaradılıb. [Керим Керимов. Дорога в космос. Баку-1995]
1991-ci ildə təqaüdə çıxan Kərim Kərimov ömrünün sonunadək Rusiyada Uçuşu İdarəetmə Mərkəzində məsləhətçi vəzifəsində çalışıb.
Kərimov Sosialist Əməyi Qəhrəmanı, Stalin, Lenin və dövlət mükafatı laureatıdır. O, Azərbaycan Respublikasının “Şərəf” ordeni ilə təltif edilmişdir. Azərbaycan Milli Elmlər Akademiyasının Fəxri üzvü seçilmişdir.
Kərim Kərimov 29 mart 2003-cü ildə vəfat edib və Moskvada dəfn olunub.
[Керимов Керим [Алиевич - председатель Госкомиссии Байконура, герой Соц. Труда — OurBaku]
