1667-ci ilin yayında don kazak qoşunlarının başçısı Stepan Razin altı min kazakla Volqa çayından çıxaraq gəmilərlə Xəzər sularına daxil olur və İran sahillərinə tərəf üzür. Yolda o, Dərbəndlə Bakı arasındakı sahilboyu kəndləri talan edir və ayrı-ayrı yerlərdə düşərgə salır. Belə düşərgələrdən biri də, keçmiş Razin qəsəbəsində dağın ətəyi idi. Rəvayətə görə, Razin öz xəzinəsini burada yerləşən mağarada gizlədir.
Sonra Razin Bakı qalasına yaxınlaşır, lakin onu tuta bilmir. O, şəhər ətrafındakı kəndləri qarət edəndən sonra, ələ keçirdiyi qənimətlər, əsir aldığı 100-dək adam və 7 min qoyunla Xəzərdəki Jiloy (indiki Çilov) adasına çəkilir. İddia edilir ki, adanın adı məhz bu hadisə ilə bağlıdır. 1763-cü ildə rus hidroqrafı F.İ.Soymonov yazırdı: “Boğazın sonunda...Jiloy adası var, lakin orada yaşayış yoxdur. Deyirlər ki, Xəzər dənizində talanlıq edən məşhur Don kazakı Stepan Razinin bir müddət orada yaşadığına görə belə adlandırılıb”. [Qılman İlkin. Bakı və bakılılar. Bakı-2006] [Соймонов Ф.И. Описание Каспийского моря и чиненных на оном Российских завоеваний.-1763]
Razinin hücumu ilə başqa bir adanın adı da bağlıdır. Deyilənə görə, kazaklar Xəzər sahillərindən aldıqları qənimətləri dənizin Zənbil adasında bölüşdürürdülər. O vaxtdan həmin ada “Duvannı” adını da almışdı. “Duvannı” sözü “duvanit” sözündən əmələ gəlib, “bölüşdürmə” mənasını verir. [Qılman İlkin. Bakı və bakılılar. Bakı-2006]
XVII əsrin Niderland səyyahı Yan Streys, Razin kazaklarının söhbətlərindən parçalar vermişdir: “… Bakıya və Astrabada tərəf üz tutdular. Qabağlarına çıxan adamları qılıncdan keçirir, evləri və mülkləri yandırdılar. Bakıya çatanda əllərinə çoxlu çaxır keçdi və onu öz aralarında bölüşdürdülər. Çaxır içməyə adət etmədikləri üçün hamısı sərxoş oldu. O zaman beş minə qədər kazak idilər. Bundan istifadə edən müsəlmanlar tez qoşun toplayıb, sərxoş kazakların üstünə düşdülər. Çox güclü və igidcəsinə vuruşurdular, demək olar ki, hamısını qırdılar... Stepan da çətin vəziyyətə düşdü. Yanında mühafizəçi olmasaydı, o da diri-diri əsir düşəcəkdi”. [Стрейс Я.Я. Три путешествия. Москва-1935]
Stepan bir neçə dəfə Bakıya uğursuz hücumdan sonra, cənuba çəkilir. Oradan qayıdandan sonra, Razin bir müddət Bakı yaxınlığındakı Səngi Muğan adasında düşərgə salır. 1669-cu ildə Səfəvi ordusu Astrabadlı Məmməd xanın başçılığı ilə adanı dövrəyə alır. Bu döyüş Stepan Razinin Xəzər dənizində axırıncı döyüşü olur və o, Həştərxana yollanır. [Кемпфер Э. Записки о персидском походе С. Разина // Иностранные известия о походе Степана Разина. Материалы и исследования. Лениград-1975] [Qılman İlkin. Bakı və bakılılar. Bakı-2006]
