Bu gün məşhur Azərbaycan hakimi Tofiq Bəhramovun anım günüdür.
Bakuplus.az xəbər verir ki, əfsanəvi referinin vəfatından 32 il ötür. O, dünya futbol tarixində adına heykəl olan və adı stadiona verilən ilk hakimdir.
Tofiq Bəhramov 1925-ci il 29 yanvarda Ağdamda anadan olub. Futbolçu karyerası istədiyi kimi alınmayan Bəhramov 1951-ci ildə Bakı kuboku uğrunda keçirilən "Dinamo" - "İnşaatçı" matçına hakim gəlmədiyi üçün 26 yaşında onu əvəz edib.
Bununla da hakimlik karyerası başlayıb. Daim prinsipiallığı, obyektivliyi ilə seçilən referi qısa müddətdə sovetlər birliyinin ən yaxşı hakimlərindən birinə çevrilib. T.Bəhramov 15 il ərzində idarə etdiyi oyunların heç birində referi oyunçuya qırmızı vərəqə göstərməyib.
Əfsanəvi azərbaycanlı hakim tarixdə öz ədalətli qərarı ilə unudulmaz iz qoyub. 1966-cı ildə dünya çempionatının Almaniya və İngiltərə milliləri arasında baş tutan final oyununda Cefri Herstin mübahisəli qolunu qeydə alan Tofiq Bəhramovun qərarının doğru olduğu sonradan bütün dünyaya bəlli oldu. Həmin ərəfədə “Qızıl fit”lə yalnız baş hakimlər təltif olunurdu.
Tofiq Bəhramov isə bu qarşılaşmada laynsman funksiyasını yerinə yetirsə də, Britaniya kraliçası “Qızıl fit”i və “Qızıl ilahə” mükafatını həmyerlimizə təqdim etmişdi.
2016-cı ildə isə Britaniyanın "Sky Sports" telekanalında müasir texnologiya ilə aparılan araşdırma Tofiq Bəhramovun qərarının haqlı olduğunu sübuta yetirib.
Tofiq Bəhramov 1975-ci ildə hakimliklə vidalaşıb. 1993-cü il martın 26-da Bakıda üçüncü dəfə infarkt keçirən Bəhramov dünyasını dəyişib. Bakıda yerləşən Respublika Stadionu onun adını daşıyır. Stadionun yaxınlığında isə dünyada ilk dəfə olaraq 2004-cü ildə futbol hakiminin xatirəsinə heykəl qoyulub.
