“Qarabağ” futbol klubunun baş məşqçisi Qurban Qurbanov heyətə cəlb etdikləri yeniyetmə futbolçulardan danışıb.
Apa.az əməkdaşının “Davud Mənsumov və Amin Rzayev haqda hansı fikirdəsiniz?” sualına cavabında baş məşqçi onların intizamlı uşaqlar olduğunu bildirib.
Qurban Qurbanov əlavə edib ki, onlar komandanın içində böyüməlidirlər: “Yaxşıdırlar. Nə qədər vaxtdır ki, bizimlə məşq edirlər. Davudu bir az gec cəlb etmişik komandaya. Üç aydır ki, bizimlə məşq edir. Aminin 16 yaşı var və 1 ilə yaxındır ki, bizimlədir. Aftandil Hacıyev onu bizə təklif etmişdi ki, perspektivli uşaqdır. Həm fiziki durumunu yaxşılaşdırmaq üçün əlavə məşqlər edirlər. Yavaş-yavaş komandaya cəlb olunurlar. Amma hələ gəncdirlər. İstəyirik ki, kollektivin içində böyüsünlər. Yaxşıdırlar. Əgər hazırda Amini bu yaşda “Qarabağ”da stoper kimi oynadırıqsa, özü də bunu düzgün etməyə çalışırıqsa, həm bizim, həm də özü üçün üstünlükdür. Davud da özünü itirmirsə, kollektivdə qol vurmaq üçün çəkinmədən hücuma gedirsə, bu da həm özü, həm də bizim üçün müsbət haldır. İntizamlı uşaqlardır”.
