Noyabrın 5-6-da Bakıda keçiriləcək yunan-Roma güləşi üzrə Dünya Kubokunun püşkü atılıb. Bu haqda bu gün, 8 oktyabr tarixində Bakuplus.az Azərbaycan Güləş Federasiyasına istinadən məlumat verir.
Bakı İdman Sarayında keçiriləcək yarışlarda Serbiyada baş tutan son dünya çempionatında ilk beşliyə daxil olan yığma komandalarla yanaşı, dünya komandası (all stars) iştirak edəcək.
Dünən Dünya Güləş Birliyinin püşkatma mərasimi keçirilib və nəticəyə əsasən yarışda iştirak edən altı komanda iki qrupa bölünüb. Belə ki, B qrupunda yer alan Azərbaycan Serbiya və dünya yığması ilə mübarizə aparacaq, Türkiyə, İran və Qırğızıstan isə A qrupuna düşüblər.
Reqlamentə əsasən, qrup mərhələsinin oyunları noyabrın 5-də keçiriləcək. Qruplarında birinci yeri tutan komandalar finala yüksələcəklər. İkinci yeri tutan iştirakçılar üçüncü yer uğrunda mübarizə aparmaq hüququ qazanacaqlar. Həlledici görüşlər noyabrın 6-da baş tutacaq.
