Bakının Səbail rayonu, Bayıl qəsəbəsində yerləşən, tarixi bina olan Şamama Ələsgərova adına 5 saylı Kliniki Doğum Evinin binasında qanunsuz tikinti ilə bağlı məlumat sosial şəbəkələrdə yayılıb. Bu haqda bu gün, 25 yanvar tarixində Bakuplus.az APA-ya istinadən məlumat verir.
Dövlət Şəhərsalma və Arxitektura Komitəsindən verilən məlumata görə, 1930-cu ilə aid olan yerli əhəmiyyətli memarlıq abidəsində qeyri-rəsmi işlərin aparılması ilə bağlı monitorinq keçirilib.
“Məlumat üçün bildiririk ki, bir müddət öncə qeyd etdiyimiz kimi, binada qanunvericiliklə nəzərdə tutulmuş qaydada razılaşdırılmamış əsaslı təmir və yenidənqurma işlərinin aparılması faktı aşkarlanıb və işlər dayandırılıb. Lakin həmin ünvanda bu gün yenidən özbaşına tikinti işlərinin aparılması faktı ilə bağlı müraciət daxil olub və həmin işlər Baş İdarə tərəfindən müvafiq xəbərdarlıq edilərək 24 yanvar 2024-cü il tarixində yenidən dayandırılıb”, – deyə qurumdan bildirilib.
Məsələ ilə bağlı aidiyyəti qurumlara, o cümlədən Tibbi Ərazi Bölmələrinin İdarəetmə Birliyinə müvafiq məlumatlar göndərilib.
Analoji hadisə ötən ilin oktyabr ayında baş verib. Onda da binanın dam örtüyünün və döşəmələrinin yenidən qurulması işləri dayandırılmışdı.
Həmin bina İkinci Dünya müharibəsinə qədər şəhər mətbəxi kimi istifadə olunub. Müharibə illərində bina evakuasiya xəstəxanası kimi istifadə edilib. 1946-cı ildən Azərbaycan SSR Səhiyyə Nazirliyinin tabeliyində olub və Nadejda Krupskaya adına 5 saylı Doğum Evi adlanıb.
Müstəqillik illərində Nadejda Krupskaya adına 5 saylı Doğum Evinin adı dəyişdirilərək Ş.Ələsgərova adına 5 saylı Doğum Evi adlandırılıb.
