Qaradağ rayonunda arvadını öldürən şəxsin məhkəmə iclası keçirilib. Bu haqda 10 mart tarixində Report məlumat verib.
Sahil qəsəbəsində 36 yaşlı Vilayət Məmmədov arvadı, 31 yaşlı Aliyə Məmmədovanı məftillə boğaraq öldürüb. Hadisə şəxsi münasibətlər zəminində aralarında yaranan mübahisə zamanı baş verib. Araşdırmadan sonra Məmmədov saxlanılıb və ona qarşı Cinayət Məcəlləsinin Qəsdən adam öldürmə maddəsi ilə cinayət işi başlanıb. Ona 9 ildən 14 ilə qədər azadlıqdan məhrum edilmə cəzası verilə bilər.
10 mart tarixində Bakı Ağır Cinayətlər Məhkəməsində keçirilən iclas zamanı zərərçəkmişin hüquqi varisi ifadə verib. Aliyə Məmmədovanın anası Yeganə Məmmədova bildirib ki, təqsirləndirilən şəxs və qızı arasında dəfələrlə mübahisə və münaqişə olub. Qətl hadisəsindən əvvəl isə onun qızı əri tərəfindən döyülüb.
"Uşaqlar olaydan əvvəl bizdə qalırdı. Onlar məktəbə və hazırlığa bizdən gedirdi. Həmin gün isə uşaqlar evdə olmayıb. Vilayət narkotik istifadə edirdi”, - deyə Yeganə Məmmədova bildirib.
Məhkəmənin növbəti iclası martın 16-na təyin edilib.
