Bakının Nəsimi rayonunda azyaşlı oğlan ehtiyatsızlıqdan almış olduğu xəsarətdən ölüb. Bu haqda bu gün, 21 oktyabr tarixində Bakuplus.az Azərbaycan Respublikası Baş Prokurorluğunun mətbuat xidmətinə istinadən məlumat verir.
Oktyabrın 14-də 11 yaşlı Abdulla Əlizadə R.Behbudov küçəsində yaşadığı evdə atəş açaraq özünü güllələyib.
Araşdırma zamanı məlum olub ki, o, Xəzər rayonu, Buzovna qəsəbəsi ərazisində kustar üsulla dəmir materialdan hazırlanmış mənşəyi məlum olmayan qurğu tapıb. Həmin qurğu ilə uşaq yaşadığı evin yataq otağında ehtiyatsız davranması səbəbindən açılmış atəş nəticəsində aldığı xəsarətdən ölüb.
Hadisə ilə bağlı Nəsimi rayon prokurorluğunda araşdırma aparılır.
