Bakının Suraxanı rayonunda yerləşən, sahəsi 800 kv.m olan binada yanğın baş verib. Bu haqda bu gün, 30 may tarixində Fövqəladə Hallar Nazirliyinin (FHN) mətbuat xidməti məlumat verib.
Birinci mərtəbəsi market, mansardı isə çayxana olan binada 225 kv.m sahədə tavan və taxta vitrin yanıb. Hadisə yerinə FHN əməkdaşları cəlb olunub. Obyektin qalan hissəsi alovdan mühafizə edilib, yanğın söndürülüb. Hadisə zamanı xəsarət alan olmayıb.
Həmçinin gecə saatlarında Xətai rayonunda da yanğın baş verib. Doqquzmərtəbəli yaşayış binasının qarşısında ağac qismən yanıb. Yüksək temperaturdan binanın 4-cü mərtəbəsində yerləşən plastik pəncərə çərçivəsi əriyib. Alışma FHN-in yanğınsöndürmə briqadası tərəfindən söndürülüb.
