Bakının Nəsimi rayonu ərazisində, “Memar Əcəmi” metrosunun yaxınlığında “Toyota Prius” markalı avtomobilin sürücüsü avtoxuliqanlıq edib. Bu haqda bu gün, 28 aprel tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Hadisə bu gün, saat 07:50 radələrində baş verib. Cəfər Xəndan küçəsindən Azadlıq prospekti istiqamətində hərəkətdə olan, dövlət qeydiyyat nişanı olmayan “Prius” markalı avtomobilin sürücüsü polisə tabe olmayaraq, dəfələrlə qaydaları pozaraq ətrafdakıların həyat və sağlamlığına təhlükə törədib, bir neçə avtomobili əzib.
Sürücü saxlanılaraq 19-cu Polis Bölməsinə təhvil verilib.
DİN-dən verilən məlumata görə, “Toyota Prius” markalı avtomobilin saxlanılması narkotik vasitələrin qanunsuz dövriyyəsi ilə əlaqəlidir. Əvvəllər müxtəlif maddələrlə məhkum olunan 36 yaşlı Rauf Qurbanovun avtomobilində külli miqdarda satış məqsədilə narkotik vasitələrin olması barədə polisə əməliyyat məlumatı daxil olub. Qurbanov saxlanılaraq cinayət məsuliyyətinə cəlb edilib.
