Bakıda polisin saxlanma məntəqəsində inzibati cəza çəkən 35 yaşlı Aslan Məmmədov ölüb. Bu haqda bu gün, 1 fevral tarixində Lent.az məlumat verib.
İnzibati Xətalar Məcəlləsinin 227-ci (xırda talama) maddəsi ilə təqsirli bilinərək barəsində iki ay müddətinə inzibati həbs tənbeh tədbiri tətbiq edilən Məmmədovun narkotik vasitələrin aludəçisi olduğundan səhhəti qəfil pisləşib. İlkin tibbi yardım göstəriləndən sonra o, xəstəxanaya göndərilib. Lakin bütün səylərə baxmayaraq, o, xəstəxanaya aparılarkən ölüb.
Meyitə baxış keçirilib, ekspertiza təyin olunub. Meyit üzərində zorakılıq əlamətləri aşkar edilməyib. Faktla bağlı araşdırma aparılır.
Mərhum Cinayət Məcəlləsinin ”Narkotik vasitələrin və psixotrop maddələrin qanunsuz dövriyyəsi ilə əlaqədar cinayətlər” və İnzibati Xətalar Məcəlləsinin müxtəlif maddələri ilə əvvəllər dəfələrlə məhkum olunub.
