Bakıda quldurluqda təqsirləndirilən hüquqşünasın cinayət işi üzrə ibtidai istintaq başa çatıb. Bu haqda 28 aprel tarixində Lent.az məlumat verib.
Nərimanov rayonunda “Minera” MMC tikinti şirkətində hüquqşünas işləyən Nicat Kərimov fırıldaqçılığa əl atıb. İttihama görə, zərərçəkmiş İlham Abdullayevin evi plana düşüb. Abdullayev Kərimovun işlədiyi şirkət tərəfindən tikilən binadan əlavə mənzil almaq istəyib. Nicat ona kömək edəcəyini deyərək, yalandan vəd verib və ondan 63.800 manat pul alıb. Lakin bu məbləğin 8000 manatı təyinatı üzrə xərcələməyib. Zərərçəkmiş həmin pulu tələb edəndə, Kərimov onun üzərinə bıçaq çəkib.
Bundan əlavə, Kərimov sənəd saxtalaşdırılmasında da ittiham olunur. O, saxta sənədlə “Baku Electronics”-dən 11.500 manatlıq “Iphone” və “Samsung” markalı telefonları almaq istəyib. Lakin bu vaxt sənədlərin saxta olduğu mağaza əməkdaşları tərəfindən müəyyən edilib.
Nicat Kərimov saxlanılıb və Cinayət Məcəlləsinin “Quldurluq, xeyli miqdarda əmlak əldə etmək məqsədilə törədildikdə” maddəsi ilə təqsirli bilinib. İş üzrə toplanan materiallar baxılması üçün Bakı Ağır Cinayətlər Məhkəməsinə göndərilib.
