Nəsimi rayonunun Mirmahmud Kazımovski, 27a küçəsində yerləşən binanın lift şaxtası yararsız hala düşüb. Bu haqda bu gün, 10 aprel tarixində Oxu.az məlumat verib.
Sakinlərin sözlərinə görə, liftin şaxtası çöküb. Vətəndaşlar bildirirlər ki, məhz bu səbəbdən yenicə mənzil alan sakinlər evlərinə köçməyə qorxurlar.
Fövqəladə Hallar Nazirliyinin (FHN) Mətbuat Xidmətindən əldə olunan məlumata görə, binada tikinti işlərinə icazə sənədi olmadan başlanıldığı müəyyən edilib. Qurum tikinti işlərinin dayandırılması barədə qərar qəbul edib.
Bina nəzarətçisinin söylədiklərinə görə, binada bərpa işləri aparılıb, binanın fasadında uçan kərpiclər bərpa edilib. O, həmçinin qeyd edib ki, hadisəyə səbəb inşa prosesindən sonra lift şaxtasına beton tökülməsi olub.
Daha öncə məlum olub ki, binanın yuxarı mərtəbəsində beton pompası partlayıb. Hadisə nəticəsində 5 avtomobilə ciddi zərər dayib. Sakinlərin sağlamlığı ilə bağlı hər hansı bir təhlükə qeydə alınmayıb.
