Ötən gün, 15 iyul tarixində axşam saatlarında Xəzər rayonu, Binə qəsəbəsində 40 yaşlı Vüsalə Əliyevanın keçmiş həyat yoldaşı tərəfindən qətlə yetirilməsinin bəzi təfərrüatları məlum olub. Bu haqda bu gün, 16 iyul tarixində Qafqazinfo məlumat verib.
Əliyeva qonşuların evinin həyətində keçmiş əri, 44 yaşlı Arzuman Fazilov tərəfindən qətlə yetirilib.
İlkin məlumata görə, Vüsalə və Arzuman bir neçə il əvvəl davamlı münaqişələr səbəbindən boşanıblar. Boşandıqdan sonra qadın iki uşaqla Binə qəsəbəsində kirayədə yaşamağa başlayıb. Hadisə baş verən gün Arzuman keçmiş həyat yoldaşını izləyəmə başlamış və Vüsaləyə yaxınlaşmaq istəmişdir.
Arzumanın onu öldürmək istədiyindən şübhələnən qadın qaçaraq qonşu həyətə daxil olub və köməyə çağırıb. Lakin Əliyevanın ardınca həyətə daxil olan Arzuman Fazilov onu yaxalayaraq çoxsaylı bıçaq zərbələri vurub. Qonşular təcili yardım çağırsalar da, qadının həyatını xilas etmək mümkün olmayıb.
Arzuman Fazilov saxlanılıb. O, ilkin ifadəsində keçmiş həyat yoldaşını qısqandığını və buna əsaslanaraq qətl törətdiyini bildirib. İstintaq davam edir.
