Xəzər rayonu, Buzovna qəsəbəsində ötən axşam ailəyə silahlı basqın nəticəsində 2 nəfərin ölümü, 2 nəfərin yaralanması ilə bağlı təfərrüatlar məlum olub. Bu haqda bu gün, 30 noyabr tarixində Qafqazinfo məlumat verib.
Verilən məlumata görə, iki həftə əvvəl 83 yaşlı Elbrus Muradovun mənzilindən 10 min manata yaxın pul oğurlanıb. Bununla bağlı ailə polisə müraciət edib, araşdırmalar başlayıb.
29 noyabr tarixində isə naməlum şəxs həmin evin qapısını döyüb. Qapını ev sahibi Elbrus Muradov açan kimi, həmin şəxs ona kəsici alətlə hücum edib, Muradovun baş və boyun nahiyəsinə çoxsaylı xəsarətlər yetirərək onu qətlə yetirib.
Mənzilə daxil olaraq həmin şəxs onun ikinci qrup əlil olan oğlu Rahil Muradova zərbələr endirib və boğaz nahiyəsinə öldürücü xəsarətlər yetirib.
Mənzilin digər otağında olan yataq xəstəsi, Elbrus Muradovun həyat yoldaşı, 77 yaşlı Şahirə Muradovaya da çoxsaylı kəsilmiş-deşilmiş xəsarətlər yetirən şəxs onun da öldüyünü düşünərək evdən çıxıb. Həmin zaman o, cütlüyün yaxınlıqda yaşayan nəvəsi Elbrus Ağalarovla qarşılaşıb və ona baş və boyun nahiyəsindən çoxsaylı xəsarətlər yetirib.
Sağ qalan Elbrus Ağalarov bildirib ki, həmin şəxs maskalı idi: “Mən həyətə daxil olanda babamın qan içində yerdə qaldığını gördüm, həmin vaxt maskalı şəxs evdən çıxırdı. Hündür, yekəpər bir insan idi, mənə hücum edərək vurmağa başladı. Ona dedim ki, “sənin arxanca düşməyəcəyəm, qoy nənəmə-babama kömək edim”. Məni buraxıb qaçdı. Tez evə daxil oldum, hamının qan içində qaldığını görüb qonşulardan kömək istədim. Xahiş edirəm, həmin adam tezliklə tutulsun”.
Hadisədən sonra xəstəxanaya yerləşdirilən və nisbətən yüngül xəsarətlərlə evə buraxılan 25 yaşlı Elbrus bildirib ki, həmin şəxsin özü ilə hər hansı əşya aparmasını xatırlamır.
Baş verənlərdən danışan qonşular bildiriblər ki, Elbrus Muradov və ailəsi çox sakit, mədəni, ünsiyyətcil insanlar idilər. Onlar yaşadıqları ərazidə artıq oğurluq hallarının baş verdiyini və cinayətin tamah və ya 2 həftə əvvəl törədilmiş oğurluqla bağlı ola biləcəyi fikrini irəli sürürlər.
