Buzovnada silahlı basqın edərək bir ailənin 3 üzvünü qətlə yetirməkdə şübhəli bilinən şəxs saxlanılıb. Bu haqda bu gün, 1 dekabr tarixində Daxili İşlər Nazirliyi (DİN) və Baş Prokurorluq birgə məlumat yayıb.
Hadisə ilə bağlı Xəzər rayon prokurorluğunda Cinayət Məcəlləsinin “İki və ya daha çox şəxsi öldürmə” və “Quldurluq, hədə-qorxu ilə tələb etməklə əlaqədar adam öldürmə” maddələri ilə cinayət işi başlanılıb.
İstintaqın nəticəsi ilə ailənin keçmiş kürəkəni, 46 yaşlı Nofəl Səfərovun ailə üzvlərini şəxsi münasibətlər zəminində aralarında yaranmış mübahisə zamanı qəsdən öldürməsi barədə əsaslı şübhələr müəyyən edilib.
Polis əməkdaşlarının həyata keçirdikləri əməliyyat-axtarış tədbirləri nəticəsində Səfərov şübhəli şəxs qismində tutularaq istintaqa təhvil verilib.
Hazırda iş üzrə zəruri istintaq-əməliyyat tədbirləri davam etdirilir.
