Bakıda gözəllik salonunda dava baş verib. Bu haqda 8 iyul tarixində Kriminalqafqaz məlumat verib.
Bu il “Javaline Studio” adlı gözəllik və sağlamlıq mərkəzinin administratoru Aydan Quliyeva (şərti) salonda çalışan usta Leyla Hüseynovanı (şərti) döyüb. Faktla bağlı Nəsimi Rayon Məhkəməsində cinayət işi açılıb.
Məhkəmədə Aydan Quliyeva ifadə verib:
“Bir gün o, işə gecikdi və mən də müdiriyyətin tapşırığına əsasən, 10 manat məbləğində cərimə yazdım. Bundan sonra o, mənə qarşı ədavətli davranmağa başladı. Hər dəfə qıcıqlandırıcı sözlər deyirdi. Hadisə baş verən gün mən masaj otağına girdim və gördüm ki, Leyla da oradadır. Mən də ondan soruşdum ki, niyə mənə qarşı belə davranır. Bu zaman o, nalayiq ifadələr işlətdi. Bundan sonra aramızda qalmaqal düşdü. Mən onun boğazından tutaraq belə sözlər deməməsini tələb etsəm də, o davam etdi”.
Həmçinin zərərəkmiş məhkəmədə dindirilib:
“Aydan Quliyeva mütəmadi olaraq məndə iradlar tuturdu, nalayiq ifadələr işlədirdi. Masaj otağında ikimiz tək olmuşuq. Aydan ora girərkən mən çıxmaq istəsəm də, o saçımdan tutaraq yoldu. Daha sonra sərt şəkildə boğazımdan tutub boğdu. Bədənimin müxtəlif hissələrinə xəsarətlər yetirdi”.
Bakı Şəhəri Nəsimi Rayon Məhkəməsinin hökmü ilə Aydan Quliyeva CM-in “Qəsdən sağlamlığa yüngül zərər vurma” maddəsi ilə təqsirli bilinərək 1000 manat məbləğində cərimə cəzasına məhkum olunub.
