Bakının Suraxanı rayonu ərazisində azyaşlı qızı vuraraq hadisə yerindən yayınan moped sürücüsü saxlanılıb. Bu haqda bu gün, 24 iyul tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Hadisə qəsəbənin Rüfət Abdullayev küçəsində baş verib. Uşağı vuran sürücü ona heç bir yardım göstərmədən hadisə yerindən uzaqlaşıb. Uşaq ağır xəsarətlərlə xəstəxanaya aparılıb.
Suraxanı RPİ əməkdaşlarının həyata keçirdikləri əməliyyat-axtarış tədbirləri nəticəsində hadisəni törətmiş moped sürücüsü, əvvəllər məhkum olunmuş Aydın Mahmudov saxlanılaraq cinayət məsuliyyətinə cəlb edilib. O, ifadəsində kuryer şirkətlərinin birində işlədiyini və qəzadan sonra polisdən yayınmaq üçün sürdüyü mopedi satdığını bildirib.
Faktla bağlı cinayət işi başlanılıb, istintaq-əməliyyat tədbirləri davam etdirilir.
