Paytaxtın Kürdəxanı qəsəbəsində yeni yaşayış massivinin ərazisində kanalizasiya sistemi olmadığına görə çirkab sular birbaşa evlərə dolur. Bu haqda bu gün, 11 aprel tarixində Bakuplus.az Baku TV-yə istinadən məlumat verir.
Yuxarı məhəllələrdən axan sular yolun kənarında toplanır, daha sonra isə evlərin zirzəmiləri dolur. Sakinlərin sözlərinə görə, bu, üfunətlə yanaşı, antisanitar vəziyyətə və xəstəliklərə səbəb olur.
Kürdəxanı bələdiyyəsindən bildirdilər ki, vəziyyətdən xəbərdardırlar. Amma problemin həlli onların səlahiyyətində deyil.
“Azərsu”dan əldə olunan məlumata görə, problem ərazidə müvafiq infrastrukturun olmaması ilə bağlıdır.
“Həmin ərazidə kanalizasiya və yağış suları infrastrukturu qurulmayıb. Orada yaşayan sakinlər, əsasən, şambolardan istifadə edirlər. Bu da yağıntılı dövrdə qrunt sularının səviyyəsinin qalxmasına səbəb olur. Amma bildiyiniz kimi, Pirşağı qəsəbəsi yaxınlığında müasir təmizləyici qurğu inşa olunub və gələcəkdə Kürdəxanı qəsəbəsinin tullantı suları da həmin kollektora daşınıb orada təmizlənəcək. Master planına uyğun olaraq mərhələlərlə həmin ərazilərdə kanalizasiya infrastrukturunun yaradılması planlaşdırılır”, - deyə qurumun mətbuat katibi Anar Cəbrayıllı bildirib.
[caption id="attachment_96825" align="alignnone" width="640"]
Foto Baku TV rəsmi Youtube kanalı[/caption]
