Bakıda kirayələdiyi avtomobili narkotik vasitənin təsiri altında idarə edən şəxs və sərnişinləri saxlanılıblar. Bu haqda bu gün, 10 aprel tarixində Bakuplus.az Daxili İşlər Nazirliyinin (DİN) Mətbuat Xidmətinə istinadən məlumat verir.
“Kia Optima” markalı avtomobilin sürücüsü təhlükəsizlik kəmərini bağlamadığı üçün yol polisləri tərəfindən saxlanılıb. Sənədlərin yoxlanılması zamanı sürücü, 21 yaşlı Şəmkir sakini İmran Bayramovun narkotikin təsiri altında olması ilə bağlı şübhələr olub.
Araşdırma zamanı İmran Bayramovun kirayələdiyi avtomobilin yük yerində hərəsi 1 kiloqram olan iki bükümdə narkotik vasitəyə bənzər maddə aşkar olunub.
Nəqliyyat vasitəsində sərnişin olan Bakı şəhər sakini Orxan Gəncəliyev və Masallı rayon sakini Gülər Abdinova da şübhəli şəxslər qismində saxlanılıblar. Onlar Sabunçu Rayon Polis İdarəsinə təhvil veriliblər. Faktla bağlı araşdırma aparılır.
